Gonzalo Suárez, premiu d'honor del Festival de Cine Asturianu de Madrid

"El realizador uvieín Gonzalo Suárez va recibir un homenaxe nel Auditoriu del Atenéu de Madrid (c/Prado, 21) como Premiu d'Honor del IV Festival de Cine Asturianu, dientro de la Gala de Pieslle y entrega de premios que tendrá llugar el próximu miércoles 2 de xunetu del 2008, según informaron los organizadores del actu.

Dicha gala entamará a les 6 de la tarde, y nella presentaránse los nueve curtiumetraxes finalistes a los Premios del xuráu. De siguío, y de magar les ocho la tarde, tendrá llugar la entrega de Premios del Festival, que concede galardones pa ocho categoríes amás del Premiu d'Honor que nesta edición ye pal direutor Gonzalo Suárez, qu'entregará nel mesmu actu los premios principales del Festival, amás de recibir un homenaxe públicu y facer un repasu pela so obra cinematográfica.
Gonzalo Suárez Morilla (Uviéu, 1934) ye ún de los primeros creadores del nomáu Nuevu Cine nos años 1960, tentando de facer un nuevu llinguaxe cinematográficu mui influenciáu pola lliteratura. En 1958 llega a Barcelona onde trabaya como periodista y guionista y entama a espublizar los sos primeros llibros (""De cuerpo presente"", ""Los once y uno"", ""Trece veces trece"", ""El roedor de Fortimbrás""). En 1966 adauta yá pal cine dalgunos relatos suyos, como ""Ditirambo vela por nosotros"" (1966) y ""El horrible ser nunca visto"" (1966).

En 1967 rueda la so primer película ""Ditirambo"", considerada la primer película moderna del cine asturianu. Trátase de facer un nuevu cine d'autor, expresionista, rompedor y de vanguardia, un cine acosáu pola censura y alloñáu del cine oficial que se facía en Madrid. Dempués rodaría películes como ""El extraño caso del Doctor Fausto"", ""Aoom"" (rodada en Llanes), ""Morbo"", ""Al diablo con amor"" y ""La loba y la paloma"".

En 1974 rueda n'Uviéu ""La Regenta"", pal productor Emiliano Piedra, integráu yá daquella na industria española del cine comercial, a la que siguen otres adautaciones lliteraries de prestixu pero non escrites por él como son Beatriz y Parranda. Llueu faería películes como ""La reina zanahoria"", los curtiumetraxes ""Una leyenda asturiana"" y ""Minimán y Superlobo"", estrenando en 1984 ""Epílogo"", onde vuelve pañar los sos personaxes de Ditirambo y Rocabruno namoraos de la mesma muyer. '""Remando con el viento"" (1987) foi otru de los grandes éxitos de crítica y públicu.

Nos años 1990 rueda ""Don Juan en los infiernos"", ""La reina anónima"", ""El detective y la muerte"", y ""Mi nombre es sombra"", a les que siguieron títulos como ""El portero"", ""El genio tranquilo"" y la exitosa ""Oviedo express"" (2007), una irónica recreación de La Regenta que consagra tou un añu d'éxitos pal cine asturianu.

Pa la televisión Gonzalo Suárez tien rodaes series d'éxitu como ""Los pazos de Ulloa"", y los trabayos titulaos ""La mujer fría"" y ""El lado oscuro"", y nesti momentu sigue escribiendo y publicando llibros."