Vecinos y ecoloxistes demanden en Ḷḷena "un ferrocarril social, públicu y sostenible"

Celebróse una marcha reivindicativa con motivu del Día Mundial del Mediu Ambiente.

Esti llunes, 5 de xunu, ye'l Día Mundial de Mediu Ambiente, qu'esti añu tien como país anfitrión Canadá. Esta fecha conmemora'l comienzu de la Conferencia de Naciones Xuníes sobre'l Mediu Humanu, celebrada n'Estocolmu nel 1972, la primera que trató cuestionaes ambientales.

Vecinos y ecoloxistes aprovecharon esta xornada de reivindicación p'afondar sobre la situación de la llegada del AVE a Asturies, manifestándose ayeri en Ḷḷena. "Queremos reivindicar un ferrocarril social, públicu y sostenible, esixir les xustes reparaciones y compensaciones a la población llocal, que más direutamente ta sufriendo les consecuencies d'esta obra gafa, asina como les responsabilidaes de too tipu que se deriven d'ella", apunta'l manifiestu de la convocatoria.

"Esta obra ye un desastre ambiental porque a los efeutos negativos que cualquier trazáu d'AVE lleva consigo –partición del territoriu, barreres ente ecosistemas, consumu enerxéticu altu, importante alteración del paisaxe...–, xúnense-y, nesti casu, impautos hidroxeolóxicos graves", afirmen, al tiempu que recuerden que la intención de llevar la velocidá alta a Xixón sería "una obra más absurda y innecesaria entovía que la de la propia variante y que, amás, d'entamase, llevaría la mayor parte del presupuestu pa comunicaciones, dexando a otros medios, más sostenibles y necesarios, ensin malpenes inversión". La crítica nun fina n'Asturies, sinón que carga contra'l Plan d'Infraestructures de Tresporte y Vivienda 2012-2024 del Ministeriu de Fomentu, "que pretende construyir 12.000 quilómetros de infraestructuras lliniales d'alta capacidá (autovíes y llínees d'alta velocidad ferroviaria)" cuando l'Estáu "yá cuenta col mayor númberu de quilómetros d'estes infraestructures", dexando escaecíes "les redes de tresporte ferroviariu de cercaníes, que son les qu'utiliza la mayor parte de la población".

Otros problemes ambientales

Los convocantes d'esta xornada reivindicativa foron les asociaciones de vecinos Campumanes y La Caleya, El Mesqueiru, Asamblea de Vecinas contra el AVE, 'Plataforma por la Defensa del Parque Natural de Les Ubiñes-La Mesa', ANA, Asociación Mediambienta La Cirigüeña, Colectivo Ecologista de Avilés, Coordinadora Ecoloxista d'Asturies, Ecoloxistes n'Aición, Colectivo Escanda, el Grupu d'Ornitoloxía Mavea y SOS Cuideiru, col sofitu de coleutivos lleoneses y de defensa del tren. Tamién aprovecharon la xornada pa recordar otros problemes ambientales que sufre'l país, como "la contaminación atmosférica, contra la que nos manifestamos ayeri –pol sábadu– en Xixón, les quemes forestales, la contaminación de suelos y agua, los ataques a la biodiversidá, l'abandonu del mundo rural y un llargu etcétera, que son consecuencia del irracional modelu enerxéticu y productivu que se nos impuso".