El Gobiernu modifica l’área afeutada pola poliya guatemaliana y declara zona tapón los conceyos de Pravia y Muros

La evolución de la plaga de la poliya guatemaliana obligó al Gobiernu a modificar l’área sometida a controles y a declarar a Pravia y Muros como conceyos tapón. Nes zones afeutaes destruyéronse hasta la fecha 20.825 quilos del tubérculu.

Con esti cambiu, pendiente d’espublizar entovía nel BOPA, incorpórense al área yá llendada delles parceles adicionales onde’l trampéu revela la presencia de la plaga, col oxetivu d’asegurar l’actuación sobre tol focu. Trátase de tierres apegaes en Cuideiru y nuna superficie pequeña del conceyu de Pravia.

Como prevención, tamién s’incluyeron na zona tampón los conceyos de Pravia y de Muros. Esta midida adoptóse en coordinación colos conceyos implicaos.

La Conseyería de Desarrollu Rural y Recursos Naturales declaró en marzu zones infestaes pola Tecia solanivora cuatro conceyos completos: Castropol, A Veiga, Taramundi y San Tiso d’Abres. Esta declaración tamién s’aplicó a delles tierres en Navia, Valdés, Cuideiru y Xixón, nun perímetru d’un quilómetru alredor de los focos alcontraos.

La normativa incluye delles midíes de control pa procurar desaniciar la plaga de la poliya guatemaliana, amás de les indemnizaciones. Aparte, el Gobiernu definió como zones tampón los conceyos de Tapia, El Franco, Cuaña y Villayón y la superficie de los conceyos de Navia, Valdés, Cuideiru y Xixón escluyida de la zona declarada como infestada, a los qu’agora s’añaden los conceyos de Pravia y Muros.

Eliminación de cultivos

Yá se remató la retirada y destrucción de tola pataca de sema nos conceyos declaraos infestaos dafechu. El volume total destruyíu foi de 20.825 quilos, a los que se sumaron otros 13.574 de material vexetal, resultáu de la eliminación de tolos cultivos esistentes en 44.299 metros cuadraos de terrén nos mesmos conceyos.

Hasta’l momentu, punxéronse 182 trampes, cantidá que va siguir aumentando hasta les 225 previstes.