El curtiu 'Ad-vientu' regresa a casa

Rodáu en gran parte nel conceyu, va proyeutase dientro de la 'Sección Asturias' del XVI Avilés Acción Film Festival.

'Ad-vientu' ye un curtiumetraxe rodáu en llingua asturiana baxo la direición de Roberto F. Canuto y Xiaoxi Xu, que cunta la hestoria d'un mozu ensin trabayu que, depués d'andar siguiendo a una moza que tien con ella unos oxetos qu'a él-y resulten familiares, ésta acaba por despeñase per un cantil ensin qu'él pueda evitalo. Trátase d'un drama psicolóxicu na que Suso, el protagonista, va andar a la busca de respuestes.

Ganadora del premiu del públicu del Día d'Asturies del LIV Festival Internacional de Cine de Gijón (FICXixón) y, hai xusto un mes, del xuráu al Meyor Curtimetraxe nel Falcon International Film Festival de Londres, participa agora na 'Sección Asturias' del Avilés Acción Film Festival, que se celebra na Casa Municipal de Cultura dende les 18 hores. Nesta sesión tamién van poder vese les cintes 'Tiempos muertos', de David P. Sañudo; 'Villa Mnemósime', de Javier Salazar'; 'Y Nadia más que tu', de Pablo Vijande; 'Exit', de José Luis Velázquez; y 'Escupitajo', d'Andrés Menéndez.

La entrada ye de baldre, previa recoyida d'entrada nel llugar de 10 a 12 y de 16 a 17.55 hores, y, tres la proyeición de los curtios a competición, el públicu va poder disfrutar del llargumetraxe 'El mundo sigue' (1963), de Fernando Fernán Gómez.