Israel pieslla otra vuelta les fronteres con Gaza

"Israel volvió a pesllar esti martes les sos fronteres cola Franxa de Gaza en respuesta a un nuevu llanzamientu de cohetes lleváu a cabu poles milicies palestines. ""Toles fronteres tán pesllaes, menos la del pasu d'Erez, abierta sólo p'actividaes humanitaries"", informó'l voceru del Ministeriu de Defensa israelí, Shlomo Dror.

Por embargu un miembru del movimientu islámicu, Sami Abu Zuhri, negó'l llanzamientu de cohetes.

Dror llamentó los fechos y aseguró que les autoridaes israelís ordenaren xubir de 60 a 90 el númberu de camiones con productos comerciales, ente ellos alimentos, unviaos diariamente a la Franxa de Gaza, controlada por Hamas. Según fontes palestines, les fuerces israelís establecíes nel pasu fronterizu de Sufa, nel sur de Gaza, dispararon y firieron a una muyer .
Un voceru del Exércitu israelí dixo que nun recibieren nenguna información sobre incidente dalgún na zona. El nuevu zarru de les fronteres na Franxa de Gaza vuelve a poner en peligru l'altu'l fueu alcordáu pol Gobiernu israelí y Hamás nesti territoriu costeru'l pasáu 19 de xunu gracies a la mediación d'Exipto nel conflictu.

El pasáu 25 de xunu, el ministru de Defensa israelí, Ehud Barak, decidió torgar el pasu de mercancíes a la zona en respuesta al llanzamientu de cohetes realizáu pola Yihad Islámica'l día anterior. Esta milicia palestina, que nun tien conexón con Hamas, vindicó'l llanzamientu de cohetes sobre'l sur d'Israel porque les fuerces militares israelís mataren a ún de los sos cabezaleros en Cixordania. Anque los cohetes llanzaos nun causaron daños personales nin materiales, sí provocaron el zarru de los pasos fronterizos.

El Gobiernu de Hamas dexó amosada entós la so oposición al llanzamientu de cohetes per parte de milicianos palestinos escontra'l sur d'Israel y aseguró que diba obligar al restu de milicies a respetar la tregua. Como muestra del so compromisu, les fuerces de seguridá de Hamas na Franxa de Gaza detuvieron a un voceru de les Brigaes de los Mártires d'Al Aqsa, que tamién llanzaron cohetes Qassam dende la Franxa de Gaza escontra la rexón isarelí de Negev, la selmana pasada dempués de qu'Israel pesllare les fronteres con Gaza."