La Ponte-Ecomuséu entama visites musicalizaes

Esti sábadu pela mañana y pela nueche.

La primera de les actividaes de La Ponte-Ecomuséu lleva'l títulu de 'Arte, vida y cultura en la Edad Media' y va consistir nuna visita a "dos de los elementos patrimoniales más representativos de la Edá Media de los Valles del Trubia": la ilesia prerrománica de Santu Adrianu, en Tuñón, y la románica de San Romano, en Villanueva. Ésta va salir a les 11 hores del centro de recepción de visitantes del ecomuséu, con desplazamientu ente los dos edificios a cuenta de los propios visitantes, va tener una duración aproximada de dos hores y medies y va tar amenizada por una actuación de música medieval.

A les 22 hores va comenzar nel mesmu llugar la segunda visita, nesta ocasión al abrigu de Santu Adriana, baxo'l nome de 'Viaja con todos tus sentidos al origen del arte'. Ésta inclúi un taller de llámpares de canela y otru de cultura oral, asina como música d'inspiración paleolítica en direuto. El percorríu tien una duración de 2 hores, nes que se van percorrer a pie 1,5 quilómetros, y pa participar ye necesario llevar un dispositivu de lluz y calzáu deportivu o botes de monte.

El preciu pa caúna de les dos actividaes ye de 10 euros p'adultos y de 6 pa menores de 12 años, siendo de baldre pa los más pequeños de 3. Pa participar ye necesario acutar plaza, al ser éstes llendaes, al traviés de los teléfonos 985.76.14.03 y 622.643.317 o del corréu electrónicu info@laponte.org.