Los estudiantes zarraos nel Rectoráu ponen fin a la so protesta

"Los estudiantes enzarraos nel Edificiu Históricu de la Universidá d'Uviéu, sede del Rectoráu, decidieron esti martes acabar cola so protesta, dempués de comprometese el rector, Vicente Gotor, a dar una ""presencia apropiada"" a la Llingua y la Lliteratura Asturiana nel futuru títulu de grau de Filoloxía.

La ventena d'enzarraos, que dende'l vienres s'instalaron con una pancarta nel pasiellu del claustru, dedidieron abandonar la movilización, tres la concentración nel so apoyu que tuvo llugar esta mañana, y a la que, según la convocante Xunta Pola Defensa de la Llingua Asturiana, asistieron más de 200 persones.

A la mesma foi tamién el rector, que s'entrevistó énte los medios colos concentraos pa reafirmase nel so compromisu, espresáu ayeri en cuatro puntos espeyaos nun comunicáu. Nos mesmos prometía ""nun escatimar esfuerzos"" pa que la Llingua y Lliteratura Asturiana tengan un ""tratamientu científicu y académicu"" na Universidá, amás de señlar la necesidá de formar profesores d'asturianu.

Pa Ernesto Suárez, representantes de la Xunta, organización que vindicó l'enzarru, los enzarraos ""algamaron un compromisu públicu del rector que valoramos"". Sicasí, recordaron que ""nun se llegó a nengún alcuerdu"" concretu col Rectoráu, polo que ""van siguir les movilizaciones próximamente por esti tema, pa dexar claro que tamos vixilantes"". Gotor anunció que'l miércoles nomará al decanu comisariu de Filoloxía, tres la renuncia al cargu d'Ana Cano por esti asuntu.
La ex decana, y tol so equipu rectoral, anunciaron la so dimisión el pasáu martes tres la decisión de la Xunta de Facultáu d'aprobar una enmienda na que se suprime l'asturianu como especialidá na propuesta de la estructura académica de cara a los nuevos títulos de grau. La decisión contó con 34 votos a favor, 30 a la escontra y siete votos en blancu.

El rector espera que'l nuevu decanu reconduza la situación pa proceder a la convocatoria d'elecciones."