Gotor comprométese a "esforzase" pa que l'asturianu tenga "espaciu académicu y científicu" na Universidá

"El rector de la Universidá d'Uviéu comprometióse a ""nun escatimar esfuerzos"" pa garantizar que la Llingua y Lliteratura Asturiana tengan un espaciu ""académicu y científicu"" na institución, si bien mostró la so intención de buscar un entendimientu al respeuto na Xunta de la Facultá de Filoloxía.

Al traviés d'un comunicáu, l'equipu rectoral resumió los cuatro puntos a los que se comprometió Gotor nel conceyu que caltuvo con representantes del grupu de persones enzarraes nel Edificiu Históricu de la Universidá dende'l pasáu vienres.
L'enzarru yera una aición de protesta, organizada pola Xunta Pola Defensa de la LLingua Asturiana y la so estaya Xunta Moza, tres l'aprobación na Xunta de Filoloxía d'una enmienda a la propuesta d'estructura del futuru títulu de grau de la materia, na que se suprimía la especialidá de Llingua Asturiana, asuntu que provocó la dimisión de la decana, Ana Cano.
Nel comunicáu, el rector nun concreta si va tratar d'incluyir la especialidá d'asturianu na propuesta. Sólo dexa claro que l'equipu rectoral ""ta comprometíu cola Llingua y la Lliteratura Asturiana y considera que debería tar, de la forma en que se considere más apropiada por tolos actores, ente los estudios de la Universidá d'Uviéu"". Asina, afirma que ""nun van aforrase esfuerzos pa llegar a un entendimientu y p'algamar que la materia ensin nengún tratu discriminatoriu, tenga'l so espaciu académicu y científicu na Universidá"". Dexa claro tamién que va respetar los alcuerdos de la Xunta de Facultá, pero que va negociar ""con tolos axentes implicaos p'algamar un consensu"", entendiendo que ""la Universidá tien de tar al serviciu de les necesidaes de la sociedá asturiana, que demanda profesionales especializaos que sólo la nuesa institución pue formar"".

Con esti envís, el rector ""va reconducir la situación na Facultá, nomando un decanu pa qu'entame un alderique académicu moderáu y convoque elecciones nel centru"". L'equipu rectoral tamién ""llamentó la situación de tensión que s'orixinó"" y desixó ""respetu hacia tolos profesores de la institución qu'esponen y defenden postures académiques na llibertá d'un estáu de derechu"" en clara alusión a les pintaes qu'apaecieron na Facultá escontra'l profesor que presentó la enmienda, Félix Fernández de Castro.

Pela so parte, la Xunta Pola Defensa de la Llingua Asturiana caltién la convocatoria de concentración énte l'Edificiu Históricu, d'esti martes a les 12.45 hores.

Xulio Casado, voceru de la Xunta y presente nel conceyu con Gotor valoró ""la disposición al diálogu del rector"" y consideró ""mui positivu"" el resultáu del alcuentru, que trescurrió ""nun ambiente mui cordial""."