Unidá Nacionalista Asturiana califica de "hipócrita" l'actitú del Gobiernu Asturianu

"La federación nacionalista apoya l'encierru d'estudiantes nel Rectoráu y apunta que ye'l momentu de tar xuntos pa derrotar ""a los que nieguen los principios mínimos de democracia y suañen con una Asturies desasturianizada"".

La Xunta Executiva d'Unidá Nacionalista Asturiana fizo una nueva valoración sobre'l cursu de los acontecimientos dempués del gravísimu fechu que supunxo la supresión, pol votu de 34 persones, de los estudios de llingua asturiana. El so voceru, Faustino Zapico, afirmó que dende la federación nacionalista ""camentamos que son especialmente graves les declaraciones d'Ana Rosa Migoya, qu'echando mano de l'autonomía universitaria nun pue disimular la so satisfaición ya hipocresía, porque los postulaos cavernícoles que comparte'l so gobiernu, asomen otra vuelta la cabeza na Facultá de Filoloxía"".

Dende UNIDÁ considérase que ""el Gobiernu ye'l principal responsable de la situación, al refugar una y otra vuelta la declaración d'oficialidá de la llingua asturiana, y tien de facese cargu d'esti asuntu pa que la nuestra llingua y la nuestra cultura tengan el llugar que-yos correspuende nesta sociedá, y eso nun tien nada que ver cola autonomía d'institución nenguna"".

El voceru d'UNIDÁ afirmó amás, en referencia a les declaraciones de Jesús Iglesias que ""ye comprensible que-y pida a Gotor que tome cartes nel asuntu, pero recordamos qu'IX-BA tuvo compartiendo'l Gobiernu hasta hai cuatro díes ensin que se notare avance nengún y cuando'l ""so"" rector, Juan Vázquez, foi l'inquisidor que prohibió la presencia de la llingua asturiana nos estudios de tercer ciclu"".

Zapico señaló que ""hai que sumar fuerces, pero nun ye presentable usar el movimientu llingüísticu como graneru electoral cuando tas fuera del Gobiernu y tragar corros y carretes traicionando les promeses que se ficieron dientro"".

Nesti sen la Executiva d'UNIDÁ considera que paga la pena recordar que ""más del 60% de los asturianos y asturianes apoyen la oficialidá"",polo que desixen la ""declaración d'oficialidá de la llingua asturiana y la igua de la política llingüística etnocida del Gobiernu asturianu"".

D'otru llau y no tocante al conflictu xeneráu en Filoloxía quieren sofitar"" l'enzarru nel Rectoráu y toles aiciones unitaries de vindicación que se necesiten cuando una minoría reaccionaria niega los mínimos principios de democracia y sueña con una Asturies desasturianizada"". Asina mesmo demanden-y al actual rector, Vicente Gotor, que solucione'l problema xeneráu na Universidá ""cumpliendo los sos compromisos de campaña""."