Andecha Astur culpa al "arecismu" del conflictu surdíu en Filoloxía

"La organización política nacionaliega Andecha Astur responsabilizó esti llunes al ""arecismu"", en referencia al presidente del Gobiernu asturianu, Vicente Álvarez Areces, y a tol so executivu; del conflictu surdíu na Facultá de Filoloxía, dempués de la dimisión de la decana, Ana Cano, pola supresión de la propuesta d'integrar la especialidá d'Asturianu, nuna enmienda aprobada pola Xunta de la Facultá.

Al traviés d'un comunicáu, Andecha Astur señaló qu'esta situación ""respuende al interés del arecismu de caltener enllamargada a la sociedá asturiana y concretamente a los seutores más concienciaos de la mesma, nun conflictu llingüísticu que nun tien igua mentes el seutor qu'ellos representen nun asuma unos principios democráticos básicos"".

Nesti sen, camienta ""prioritario asimilar la consideranza de conflictu llingüísticu a conflictu democráticu"", y asume la necesidá de ""marcar les propies llinies y ritmos d'actuación, a la gueta de la necesaria normalización democrática n'Asturies"".

Pa la organización, ye evidente ""cómo pa caltener esi conflictu llingüísticu'l 'arecismu' vese obligáu a recurrir ca vuelta con mayor frecuencia a elementos españolistes ultrareaicionarios, lo qu'espeya'l so progresivu aislamientu social"". El testu señala tamién que ""la cuestión política fundamental nestos intres, y de la que pretenden desviar l'atención ye la reforma d'un estatutu impuestu que tampoco se mos va a permitir votar, y la esistencia d'una institución comu'l 'Principado' impuesta dende'l Gobiernu central y que tampoco nun se mos permitió votar"".

Nel comunicáu, Andecha tamién critica a Izquierda Xunida, a la que tacha de ""hipócrita"" porque ""non solo nun llevó alantre la oficialidá cuandu tenía capacidá pa ello, sinón que nos conceyos onde gobiernen siguen ensin respetar los derechos llingüísticos de los sos vecinos"".

La organización descargó poro ""tola responsabilidá de lo asocedío sobre la clase política gobernante n'Asturies por ñegase a aceptar principios democráticos internacionalmente reconocíos, negándose a solucionar un conflictu que tien una solución perfácil y que pue resumise en dos pallabres: oficialidá yá"". Espresó de siguío'l so deséu de que'l conflictu creáu ""tenga un costu pal arecismu"".

Tamién mostró la so solidaridá col grupu de persones enzarráu nos pasiellos del Edificiu Históricu de la Universidá por esti tema, y cola decana dimitida, Ana Cano."