ERC valora'l manifiestu pol castellán como un "robu a la intelixencia"

"El secretariu xeneral d'ERC y voceru del partíu nel Congresu, Joan Ridao, calificó como ""robu a la intelixencia"" el Manifiestu pola Llingua Común en defensa del castellán y recordó que'l castellán ye una llingua oficial en Cataluña por ""imposición de munchos sieglos"".

En rueda prensa celebrada dempués del conceyu de la executiva d'ERC, atribuyó'l manifiestu a ""persones que viven nun auténticu microclima mesetariu"" y que ""desconocen o quieren desconocer la realidá que se vive en Cataluña, País Vascu o Galicia"".

Criticó'l testu por consideralu un ""productu del nacionalismu llingüísticu español escluyente y caducu"" que ""revela, amás, una clara ideoloxía de supremacía per parte de la cultura castellana"" que ""parte de la premisa de qu'hai llingües meyores qu'otres"". Pal voceru d'ERC nel Congresu, ""manda calao dicir que'l castellán ta en peligru en Cataluña"" o que los sistemes d'introducción llingüística pónenlu en peligru cuando, pese a la introducción, el castellán ""non sólo nun desapaeció"" sinón que ""tien una presencia mui viva y mui importante"" en Cataluña.

""Si'l catalán nun desapaeció dempués de sieglos de persecución secular, ¿cómo va desapaecer el castellán, que tien una fuerza política y cultural enorme en tol mundu?"", entrugó Ridao.

El dirixente republicanu opinó que ""nun se pue falar de llingua común"" sinón de ""llingua oficial"", y recordó que ""si ye oficial (en Cataluña) ye por circunstancies polítiques y históriques y por una imposición que duró munchos sieglos""."