Tuenda tien segunda parte

"El tríu Tuenda, formáu por Xosé Antón “Ambás”, Elías García y Pepín de Muñalén presenta esta selmana’l so segundu trabayu discográficu. Col esplicitu nome “Tuenda 2”, el grupu vuelve a apostar pol mesmu discursu musical nesti discu nuevu, que va sonar per primer vegada esti xueves día 3 nel Teatru Filarmónica d’Uviéu.

La bona acoyida que tuvo l’anerior trabayu de Tuenda fexo que’l grupu nun dudara en qué taba faciendo lo corrrecto, y que pa qué diben cambiar la “fórmula del éxitu”, facer daqué colo que te sientes agusto, aportes daqué a la cultura asturiana y pa encima, a la xente gústa-y. Asina, la reellaboración cuidadosa y midida de temes del repertoriu vocal tradicional asturianu ye la guía que marca esti Tuenda 2.

14 temes entesacaos del archivu personal del cantante del grupu, Ambás, qu’otra vegada propónnos un viaxe per toa Asturies per aciu de la música y tamién de la variedá llingüística del país. Xunta la voz d’Ambás, topamos otra vegada’l bouzouki de Elías García y la xiblata travesera de Pepín de Muñalén, tocando col mesmu estilu que nel cd anterior. El discu ta en parte dedicáu, como nel trabayu anterior, a una de les informates d’Ambás, Vitoria de La Molina del llugar de Banduxu nel conceyu de Proaza. Bonos exemplos los dos, muyer y llugar, de la cultura tradicional asturiana, una pola so sabiduría musical y l’otru por ser ún de los pueblos que caltién casi íntegra la arquitectura tradicional, visita recomendable.

El grupu volvió a fuxir nesti Tuenda 2 de les escesives collaboraciones, namás que baxos de Sergio Rodríguez de Tutu Estudios en dos temes y el chelu d'Hector Braga n'otru tema, poro, puede facer nel escenariu una recreación perfecta del trabayu discográficu. Pa comprobalo, namás qu’hai que dir el xueves día 3 al teatru Filarmónica d’Uviéu a les 21 hores, pagar los 5 euros d’entrada y esfrutar d’un conciertu que Tuenda anuncia puede que tenga varies sorpreses."