Los Ecoloxistes presenten alegaciones a la central d'El Musel

"La Coordinadora Ecoloxista presentó alegaciones al Estudiu d'Impautu Ambiental pa la construcción d'una central de ciclu combináu de 860 MW n'El Musel empobinada por Endesa y qu'ocuparía una finca a la mandrecha de la ría d'Aboño.
Pa los ecoloxistes, esta central aumentaría de manera ""significativa la mala calidá del aire"" del los conceyos de Xixón y Carreño. De la mesma manera, los ecoloxistes consideren que ""nun tien xacíu nengún nin necesidá presente nin futura colos crecimientos de demanda eléctrica previstos na rexón"".

Al empar, recuerden qu'esta nueva central d'El Musel vien a xuntase a les otres nueve previstes na rexón y nuna Asturies que produz el 6,5% de la enerxía eléctrica española y ""siendo namás el 2,4% de la población"". D'otru llau, afirmen que'l proyeutu nun ofrez alternatives d'instalación, ""a la escontra de lo que desixe la normativa"" y la colocación prevista ""nun respeta la distancia del 2.000 metros a cuntar dende'l nucleu más próximu de población agrupada, como ye Xibares en Carreño, que va tar a 1.313 metros y el pobláu de Pescadores d'El Muselín que ta a 1959 metros, incumpliendo l'actual normativa vixente"", según informó'l colectivu al traviés d'una nota prensa.

Tampoco se tien en cuenta, n'opinión de los ecoloxistes, l'impautu que va suponer l'enfriamientu con agua de mar, nin el saltu térmicu que se produciría colos vertíos al mar d'esta agua caliente, nin se considera ""apropiadamente"" l'impautu de la subestación de Carrió colos sos impautos ambientales y sanitarios."