La Oficina la Llingua pon en marcha una campaña p'averar la llingua al sector turísticu

"La Oficina Municipal de la Llingua, en comuña col Ayuntamientu de Xixón y la Sociedá Mesta de Turismu, entamen una campaña de repartu de tarxetes postales, disponibles nos diferentes puntos d'información turística de la ciudá.

En pallabres de la responsable de la Oficina Municipal de la Llingua, MªXosé Rodríguez López, esta campaña forma parte de la rempuesta al estudiu sociollingüísticu que dio como resultáu qu'ente'l 60 y el 70 por cientu de la población ""demanda que s'use l'asturianu en grandes actos y cuestiones rellacionaes col turismu"".

Les postales, cuatro en total, muestren a una familia en cuatro puntos d'interés turísticu de la ciudá, como son la Universidá Llaboral, la Playa San Llorienzo, el Xardín Botánicu y un chigre de la ciudá. Amás apaez nelles pallabreru qu'acompaña a caún de los elementos qu'apaecen nos dibuxos.

El Xerente de la Sociedá Mesta de Turismu, Joaquín Miranda, señaló qu'estes cuatro postales namás son sólo la primer entrega, pero que ""entovía queden munchos recursos turísticos por espeyar en tarxetes"", ente los que destacó l'Acuariu.
A lo cabero, el conceyal de Cultura Tradicional y Política Llingüística del Conceyu de Xixón, Jesús Montes Estrada, afirmó que la iniciativa va tener una gran acoyida y según la so opinión les doce mil unidaes ""van desapaecer en nada"". Montes Estrada sorrayó que les tarxetes ""nun ye una campaña ensin más"", sinón qu'hai que sumales a les otres munches que dende'l conceyu xixonés tán poniéndose en marcha y punxo como exemplu'l mapa de topónimos o la Romería de San Pedro, que va desarrollase esti sábadu nel Pueblu d'Asturies."