El secretariu xeneral de la USO diz que la eliminación de l'asturianu ye "un atentáu a la nuestra cultura"

"El secretariu xeneral del sindicatu USO, Francisco Baragaño, valoró esti vienres la decisión de la Xunta de Filoloxía de non incluyir na so propuesta de títulu de grau la especialidá d'Asturianu, como un ""atentáu pa la nuesa cultura, orquestáu non sólo dende l'interior de la Universidá, sinón con posibles ramales fuera d'ella"".

Al traviés d'un comunicáu, el sindicalista sumóse a la llista d'organizaciones que mostraron la so solidaridá cola dimitida decana, Ana Cano, y la so condena a la decisión de suprimir l'asturianu de les llingües modernes nel nuevu títulu de grau de filoloxía.

""La decisión de la Xunta de Filoloxía de la Universidá d'Uviéu de dexar l'asturianu fuera de la nueva estructura de la Facultá, significa un nuevu atentáu pa la nuesa cultura, orquestáu non sólo dende l'intentu de la universidá, sinón con posibles ramales fuera d'ella"", señala'l testu.

Dende'l so puntu de vista ""la postura pretende acabar con años de llucha pola defensa de la nuesa llingua y esta prohibición ye contraria a la llegalidá vixente y a la postura de la Xunta Xeneral del Principáu"". Recordó que'l sindicatu ""siempre caltuvo posiciones flexibles, onde nun s'obligaba a naide a estudialu, y onde l'estudiante podía o non matriculase nestos estudios, lo que sí se demostró nos últimos años yera'l grau d'aceptación y l'aumentu constante d'alumnos interesaos na asignatura, lo que nos facía acoyer esperances d'una reconocencia total, y el so grau d'aceptación ente la ciudadanía en xeneral"". ""Esta marcha atrás cultural interesada nun mos va dexar indiferentes y dende les organizaciones implicaes na so defensa y usu vamos doblar esfuerzos pa poner a la nuesa llingua y cultura nel llugar de respetu que se merecen"", añadió Baragaño.

Amás, tresmitió-y a la ex decana de Filoloxía y presidenta de l'Academia de la Llingua los sos respetos ""sinceros, pol so trabayu a lo llargo d'estos diez años y la so coherencia al non asumir nestos momentos una responsabilidá que nun ye reconocida dientro de la Facultá de Filoloxía de la Universidá"". ""Sé que vas siguir na llucha, como siempre, y nella vamos tar contigo, y con tolos que vienen defendiendo la nuesa cultural demientres décades"", finó Baragaño."