Un grupu d'estudiantes enciérrase nel Rectoráu de la Universidá d'Uviéu

"Énte los fechos asocedíos na Xunta de Facultá de Filoloxía, onde una propuesta del profesor Félix Fernández de Castro y la posterior votación, que salió ganadora con mayoría relativa, aparta a la llingua asturiana nel nuevu plan de titulaciones universitaries, un grupu d’estudiantes de la Universidá d’Uviéu ta acabante d’encerrase nes dependencies del Rectoráu na cai san Francisco.

Los estudiantes, en coordinación cola Xunta pola Defensa de la Llingua Asturiana y Xunta Moza, quieren, asina, denunciar la esclusión que se ta faciendo ""per parte de los sectores más retrógrados"" de la llingua asturiana nel ámbitu universitariu. Condergando a la llingua, dende'l puntu de vista de los estudiantes, a ""quedar al marxe de la institución académica más importante d’Asturies"".

Anuncien asina mesmo'l calter indefiníu d'un encierru, que ""pretende facer un llamáu a la comunidá universitaria, encabezada pol nuevu Rector Vicente Gotor, asina como al gobiernu asturianu pa que pongan igua a esta situación crítica que dinamita tol sistema educativu, dexando a Asturies ensin la ferramienta básica pa la formación de profesionales y profesores de llingua asturiana"".

Dende la Xunta pola Defensa de la Llingua Asturiana faen un llamáu a la comunidá universitaria y la sociedá asturiana pa que ""tome parte d’esta iniciativa y se movilice pa preservar los derechos llingüísticos d’Asturies, brutalmente conculcaos tres el determín acientíficu y demagóxicu tomáu na Xunta de Facultá de Filoloxía""."