El despoblamientu rural protagoniza la charra mensual d'Ástura

El convidáu nel Atenéu Obreru de Xixón ye l'antropólogu Adolfo García Martínez.

'Asturies ante'l despoblamientu rural: una mirada dende l'antropoloxía' ye'l nome de la conferencia de mayu sobre cultura asturiana que tolos meses entama l'Asociación Cultural Ástura. Nesta ocasión el protagonista ye García Martínez, autor del manifiestu 'Alabanza de aldea' (2016), "una mirada antropolóxica, científica y global sobre’l trescursu de los pueblos d’Asturies, que tenta d’asoleyar lo que ta tapecío pa poder pescanciar lo que ta a la lluz y nun se comprende", apunten dende Ástura.

"Esti estudiu caltúvose dende mediaos del sieglu pasáu hasta’l presente" y nél l'antropólogu "pescuda que la crisis de los pueblos dende los años 60 ye más sociocultural qu’económica, lo mesmo que nel restu d’Europa, onde la certidume d’esta crisis y l’aplicación de soluciones aventáyanos en venti años", añaden. La hora prevista de comienzu de la charra va ser mañana a les 19.30 hores, con entrada llibre.