L'Academia pide la introducción de la Filoloxía Asturiana nos nuevos títulos de grau

"L'Academia de la Llingua Asturiana pidió-y al Principáu y al Rectoráu qu'introduzan la especialidá d'asturianu dientro de los títulos de grau que s'ufierten na Facultá de Filoloxía.

Al traviés d'un comunicáu, l'Academia plantegó esta demanda en respuesta a la dimisión de la decana de Filoloxía, Ana Cano, tamién presidenta de l'Academia, dempués de que la Xunta de la facultá refugara por 34 votos la inclusión de la especialidá na so propuesta de títulos de grau.

L'Academia dexó amosáu nel testu'l so enfotu en que'l ""nuevu Equipu Decanal y la Xunta de Facultá seyan quién, xunto col Rectoráu y les autoridaes del Principáu d'Asturies, a reconducir la situación presente y dar a los estudios d'asturianu'l llugar que-yos correspuende, como una llingua más de les que s'ufierten na Facultá de Filoloxía, dientro de la estructura de los nuevos títulos de grau. Y nun sedría aceutable nenguna otra solución intermedia"".

De la mesma manera, denunció ""los argumentos demagóxicos y alarmistes nos que se sofitaba la enmienda que foi aprobada, al entemecer lo académico colo político-ideolóxico, tal y como se pue apreciar, por exemplu, na llinia argumental que recoyía testualmente'l documentu"". Nesti puntu, el comunicáu trescribe una parte de la propuesta: ""yo _diz el proponente_ nun pueo apoyar una inclusión que contribúi a reforzar la imaxe del asturianu como llingua nacional, posibilidá que yo, polo menos, nun desearía ver realizada"".

L'Academia pidió tamién a les ""fuerces polítiques parllamentaries asitiaes na Xunta Xeneral del Principáu que traten la solución definitiva d'estos y otros problemes arreyaos al exerciciu de los derechos llingüísticos de los asturianos, pente medies del reconocimientu xurídicu del asturianu como llingua cooficial nel Estatutu d'Autonomía d'Asturies"". Al empar l'Academia diz que ""se llega a esta situación xustamente porque nun cumplieron les correspondientes autoridaes un pautu anterior de la mesma Facultá que pidió nel so día que se creare la especialidá de Filoloxía Asturiana"".

Entiende tamién la institución que, con esta decisión, incúmplese la Llei d'Usu y del Asturianu de 1998: ""la Universidá d'Uviéu, nel exerciciu de les sos competencies y col fin de garantizar la capacitación afayadiza del profesoráu necesariu pa la enseñanza del bable/asturianu, llevará darréu, al traviés de los correspondientes departamentos, la formación inicial d'ésti. Del mesmu mou, compete a la Universiá la investigación llingüística y filolóxica en rellación col bable/asturianu""."