La Casa del Oso recibió 13.618 visitantes nel 2016

Más de 7.300 persones participaron nos programes d'educación ambiental de la Fundación Oso de Asturias (FOA).

L’añu 2016 finó con un rexistru de 13.618 visitantes nel Centru d’Interpretación de la Casa del Oso, asitiáu en Proaza, lo que supón 1.336 más que l’añu anterior. Mentes, un total de 7.395 persones participaron nos distintos programes d'educación ambiental entamaos pola entidá cultural privada ensin ánimo d’arrequicimientu con sede nesti centru d’interpretación, de les que 5.473 fueron escolares, 444 profesores y el restu, adultos. Ésta ye la cifra más alta rexistrada nes actividaes que convoca la entidá dende la so creación en 1992, va 25 años.

Estos datos presentáronse güei mientres la xunta del patronatu de la FOA, presidíu por primer vegada por Nicanor Fernández. Mientres l'alcuentru, al qu'asistieron la conseyera de Desarrollur Rural y Recursos Naturales, María Jesús Álvarez, en calidá de vicepresidenta de la Fundación, y el direutor xeneral de Recursos Naturales, Manuel Calvo, analizóse la memoria d'actividaes de la entidá. Tamién s'informó del proyeutu ‘Trabajando el bienestar de los osos pardos cautivos’, diseñáu pola entidá y escoyíu pola Fundación Biodiversidá, dependiente del Ministeriu d'Agricultura y Pesca, Alimentación y Mediu Ambiente.

La FOA va recibir anguaño una subvención de 13.870 euros pa impulsar esta iniciativa, que tien como finalidá l'arriquecimientu ambiental de los cercaos, la instalación de cámares de seguridá y el siguimientu etolóxicu de los animales, amás del desenvolvimientu de cursos de formación y intercambios con otros centros.

Visita d’un colexu de Ciudad Real

El programa d'educación ambiental Valles del Osu, que la entidá cultural adelantó anguaño al mes de marzu por mor del gran númberu de solicitúes presentaes, va cuntar con más 800 escolares y cola novedá de la participación d'un colexu de Ciudad Real. Esta ye la primer ocasión en qu'estudiantes de fuera d'Asturies asisten a actividaes de la entidá.

Esta actividá busca formar al alumnáu n'actitúes positives contra'l mediu ambiente y el respetu y cuidáu de la ñatura.

Na semeya, los miembros del Patronatu de la FOA.