Suatea acusa a dellos sectores de Filoloxía de "politizar cuestiones llingüístiques"

"El sindicatu d'enseñanza Suatea quier sumase a les crítiques recibíes dende diferentes ámbitos de la sociedá asturiana énte la dimisión de la decana de Filoloxía.

Al traviés d'un comunicáu de prensa, Suatea quier amosar el so ""rechazu total énte un fechu de tal gravedá"", afirmando que ""énte fechos tan cotidianos y graves como que n'Asturies se torgue l'estudiu de la so llingua a les persones que quieran facelo, la oficialidá vese más necesaria que nunca"".

Suatea camienta que, con decisiones d'esti calter, ""queda n'evidencia que la simple proteición del Asturianu y los planes de normalización colos que'l gobiernu nos entretién, les lleis aprobaes na Xunta, los mandaos de la propia Xunta Xeneral, los articulaos de los reglamentos universitarios, siguen siendo papel moyáu"".

""Queden n'evidencia énte sigo mesmos -porque la votación foi secreta- los dueños de los siete votos en blanco: dempués de cuasi trenta años de reivindicación argumentada hasta la saciedá, ¿nun tienen claru'l so votu?"", añadió'l testu. Amás, acusó'l ""departamentu de la Llingua Española d'actuar a la escontra d'una asignatura de la propia Facultá"". ""Ésti debería desplicar la so postura públicamente y con argumentos llingüísticos, ¿o ye qu'hai otru tipu d'argumentos?"", añadió.

Pa finar manifiesten el so apoyu al equipu decanal dimitíu de recién, sorrayando ""el nuestru más firme rechazu al intentu torticeru d'un sector d'esa Facultá de politizar d'una manera rancia les cuestiones llingüístiques d'esa institución""."