De la Vega afirma que la pluralidá de les llingües ye un patrimoniu "a conocer, reconocer y defender"

"La vicepresidenta del Gobiernu, María Teresa Fernández de la Vega, afirmó esti xueves que nun hai nengún problema cola llingua castellana, nin ta en peligru, nin n'España nin nel restu'l mundu.

Asina se manifestó en declaraciones a TVE, dempués de que fuere preguntada pol manifiestu a favor del castellán promovíu por un grupu d'inteleutuales. La númberu dos del Gobiernu dixo que va apoyar ""cualquier manifiestu a favor d'espandir, afondar y avanzar"" na conocencia de la llingua, pero dexó claro que, dende'l so puntu de vista, nin hai un problema col castellán, nin pue dicise que tea ""en peligru"" nin n'España nin nel restu'l mundu.

El castellán, dixo, ye una ""llingua guapísima, que ta medrando y con un patrimoniu cultural impresionante"" y, amás, el principal manifiestu pa la so defensa ye la propia Constitución española, qu'afita'l castellán o español como llingua oficial y añade qu'en dalgunos territorios hai llingües cooficiales coles que tien de coexistir.

De la Vega sorrayó que ""la pluralidá"" de llingües ye un ""patrimoniu qu'hai que conocer, reconocer y defender"" y que'l Gobiernu español ta ""vixilante pa defender y protexer los derechos fundamentales de los españoles"", incluyíu l'usu de la propia llingua, ""vivan onde vivan""."