La Col.lá Propinde participa na IV Nueche Celta de Barcelona

"El grupu de L.lena, ""La Col.lá Propinde"", participará'l próximu sábadu 28 de xunu, na IV Nueche Celta de Barcelona, entamada pol Centru Asturianu de la ciudá.
El grupu ufrirá un conciertu nel que va poder disfrutase del repertoriu del so discu ""Güeria"", dedicando la so música a los emigraos d'Asturies.
La Col.la Propinde naz nel conceyu de L.lena nel añu 2000, espublizando'l so primer discu ""L.l"" dos años dempués. Amás de les collaboraciones col rapetu Dark la eMe y nel discu ""Salú ya Dixebra. Perversiones"", edita un segundu discu ""Güeria"" y trabaya anguaño nel terceru, inda ensin nome.

Los componentes del grupu son: Manuel (Nel) como vocalista, Alex Domínguez a la guitarra y los coros, David Suárez (Cai), cola flauta, les xiblates y los coros; Cano na guitarra, Lluis Moro colos teclaos y curdión diatónicu, Ángel (Gelete) na batería, les percusiones y los coros, y Germán Gutiérrez col baxu llétricu."