La consulta d'Ibarretxe saldrá alantre colos votos d'EHAK

"El proyeutu de Llei de consulta va salir alantre mañana nel Parlamentu vascu col apoyu d'EHAK, qu'afirma que ""va ser España quien torgue"" la consulta a los vascos, según publica'l diariu Gara, que cita fontes d'Ezker Abertzalea, el grupu parlamentariu abertzale.

Según informa'l mediu, tovía ""siendo mui críticu"" cola iniciativa del Gobiernu vascu, el grupu d'EHAK va permitir que s'apruebe na Cámara la celebración d'una consulta popular.

Con ello quier ""que se vea con claridá que ye'l marcu constitucional quien torga'l derechu a decidir d'Euskal Herria y que'l PNV nun va facer nada por superalu"". La fórmula de votu desvelaráse en rueda prensa. El diariu vascu recueye que'l pasáu martes la vocera d'Ezker Abertzalea, Nekan Erauskin, afirmó qu'una prohibición del Tribunal Constitucional d'una consulta aprobada pol Parlamentu vascu, ""amuesa quién ye'l que-y torga la voluntá al pueblu vascu, quién-y niega a Euskal Herria'l derechu a decidir el so futuru"".

Nesta llinia, en referencia a les declaraciones nes que'l presidente del EBB, Iñigo Urkullu, dixo que'l PNV acataría la llegalidá en casu de prohibición, Erauskin añadió que ""diga lo que diga Ibarretxe, el derechu a decidir d'Euskal Herria nun entra na llegalidá y na Constitución que'l PNV diz que va siguir"". ""Nun hai futuru pa Euskal Herria nesti marcu. Hai que cambialu por ún verdaderamente democráticu"", señaló.

Según adelantaron a Gara fontes d'Ezker Abertzalea, l'escenariu que va abrise a partir del vienres será que ""España torgue la consulta y el PNV acepte"". Nesta llinia, les sos parlamentaries van dexar clara la fórmula escoyida pa la votación que va celebrase mañana nel Plenu del Parlamentu."