Ana Cano pide-yos a Educación y al Rectoráu que tomen una decisión sobre la especialidá de Filoloxía Asturiana

"La recién dimitida decana de Filoloxía, Ana Cano, considera que'l Rectoráu de la Universidá d'Uviéu y el Gobiernu del Principáu d'Asturies tienen de tomar ""yá una decisión"" sobre la necesidá de puesta en marcha de la especialidá d'asturianu na Facultá de Filoloxía.

La presidenta de l'Academia de la Llingua pronuncióse nesti sen en declaraciones a Europa Press, dempués de que presentara la so dimisión, con motivu de l'aprobación d'una enmienda qu'eliminaba la llingua asturiana como especialidá dientro del ""maior"" Llingües Modernes, que compondría'l títulu de grau de Filoloxía.

Con 34 votos a favor y 30 a la escontra, la Xunta de la Facultá correxía la propuesta del Decanatu d'adautación de la Filoloxía al Espaciu Européu d'Enseñances Superiores. Dende'l so puntu de vista, tanto'l conseyeru d'Educación, José Luis Iglesias Riopedre, como'l rector, Vicente Gotor, tendríen que tomar parte nesti asuntu. ""Vamos ver qué pasa col nuevu equipu, y qué decisiones tomen en rellación con esto'l nuevu rector y el conseyeru, porque en definitiva los títulos universitarios dependen del Principáu y el Rectoráu"", afirmó Cano.

Nesti sen, recordó que les decisiones de la Xunta de Facultá ""son democrátiques y deben ser respetaes, pero'l conseyeru y el rector tienen d'analizar si realmente quieren una titulación d'asturianu o non, y les consecuencies qu'eso va tener"".

RAZONES DE LA DECISIÓN.

Ana Cano nun atribuyó a nengún factor concretu l'aprobación de la enmienda, cuando hasta agora la Xunta de la Facultá siempre apoyare la creación de la especialidá de Llingua Asturiana. ""La xunta ta compuesta por unes persones que cambien y nunos momentos determinaos hai persones qu'asisten y otres que non"", esplicó. Piensa amás que ""si la votación se repitiera pasáu mañana nun hai nenguna seguranza de que'l resultáu fuera'l mesmu"".

""Asina ye'l xuegu democráticu"", añadió, dexando claro que ""tol mundu sabía qué se diba votar, porque la propuesta y les enmiendes unviáronse a tolos componentes"".

DECISIÓN ""MUI GRAVE"".

""Ye una decisión cola que yo nun pueo siguir como decana de nenguna de les maneres. Llaméntolo muncho, paezme mui grave, antiacadémico, antiuniversitario y anticientífico que la Facultá de Filoloxía de la Universidá Asturiana evite que l'asturianu forme parte de la enseñanza reglada y que puea tar presente nes nueves titulaciones de grau, acordies col nuevu espaciu européu"", afirmó.

Al so xuiciu, con esta decisión, ""el problema de creación de Filoloxía Asturiana va siguir pendiente"". Asegura amás que yera un tema ""que taba mui bien encarriláu, porque yera una propuesta sumamente moderada, novedosa pa la Facultá y mui flexible pa los estudiantes, porque la elección dependía del alumnu, yá que nin siquiera s'obligaba a naide a cursar asturianu"".

La presidenta de l'Academia señaló que, a partir d'agora, nun se sabe qué va pasar cola enseñanza d'asturianu na Universidá y condicionó'l futuru de la materia a ""lo que faiga'l nuevu equipu decanal"". Esclarió, sicasí, que la decisión nun quier dicir que vaya desapaecer l'asignatura d'asturianu, tal y como s'imparte nesti momentu na Facultá, en calidá d'optativa.

PREOCUPACIÓN EN POLÍTICA LLINGÜÍSTICA

Pela so parte, la direutora xeneral de Política Llingüística, Consuelo Vega, en declaraciones a Europa Press, mostró la so preocupación por esta decisión, nel sen de que la mesma puea traer consigo la ""renuncia"" per parte de la Universidá, ""a lliderar los estudios sobre la llingua asturiana y da-yos rigor académicu y científicu, porque me paez que ye'l sitiu ideal pa que dende ellí s'espardan tolos análisis rellacionaos cola Filoloxía Asturiana"".

Recordó amás que'l so llabor nel Principáu ye la promoción de la llingua y nesi sen destacó la ""importate"" lliteratura del idioma, con una historia que foi analizada en dellos estudios de la Universidá."