Los Trabayadores pola Normalización Llingüística piden-y al rector que "cumpla'l so compromisu públicu"

"L'Asociación de Trabayadores pola Normalización Llingüística espresó esti miércoles, al traviés d'una nota de prensa, la so ""enritación énte los fechos que llevaren a la decana de Filoloxía a presentar la dimisión irrevocable como cabezalera d'esta institución"" amosando ""públicamente la nuestra solidaridá tanto con Ana Cano como col so equipu directivu"".

L'Asociación valora la eliminación de la llingua asturiana de la propuesta decanal como ""ún de los ataques más graves de los munchos que la llingua asturiana vien soportando"".

Dende'l so puntu de vista ye ""bien llacerioso que, dende una institución como la Universidá d'Uviéu, se torgue yá non solo l'usu sinón la posibilidá del deprendimientu y del estudiu de la llingua asturiana por parte d'un grupu de profesores, pasando penriba de tola llexislación d'obligáu cumplimientu, como la constitución española (artículu 3.3 ""La bayura de les estremaes modalidaes llingüístiques d'España ye un patrimoniu cultural que sedrá oxetu d'especial respetu y procuru""), la Llei d'Usu y Promoción del Asturianu que, nel so artículu 10 garantiza la enseñanza del asturianu en tolos niveles y graos, o la Carta Europea de les Llingües Rexonales, firmada pol gobiernu español"".

Asina mesmo, y penriba de les considerances de tipu llegal, espresen el so esmolecimientu cola presencia de profesores na Facultá de Filoloxía que ""nun tienen más esmolición qu'enzancar l'enanchamientu de los conocimientos llingüísticos de los sos alumnos quitándo-yos la posibilidá d'estudiar una llingua que ye patrimoniu de tolos asturianos"", en referencia al profesor Félix Fernández de Castro. Nesti sen, camienten que'l trunfu de la enmienda d'ésti ye la confirmación de que ""los criterios llingüísticos son los que menos pesen na cuestión del asturianu, dexándose guiar por zunes personales y cuestiones que nada tienen que ver cola filoloxía"". A la fin, califiquen l'actitú d'esti grupu de profesores como un tipu de ""fascismu"" que ye ""amás d'illegal, un abusu y un despreciu pa coles persones que, nel exerciciu de la so llibertá escueyen el deprendimientu de la llingua asturiana na estaya universitaria.

Asina desixe-y al rector de la Universidá d'Uviéu que ponga en práutica ""el so compromisu públicu"" robláu cola Xunta pola Defensa de la Llingua Asturiana nel procesu d'elecciones y nel qu'espresaba la so defensa a la creación d'una Filoloxía Asturiana."