L'Aconceyamientu de Xuristes pol Asturianu califica l'actitú de la Facultá de Filoloxía como "Golpista"

"L'Aconceyamientu de Xuristes pol Asturianu, súmase a la bayura de rempuestes que se tán produciendo dende l'ámbitu de la llingua asturiana de magar la dimisión de la decana de Filoloxía de la Universidá d'Uviéu, Ana María Cano.

L'Aconceyamientu ""llamenta daveres lo asocedío na Facultá de Filoloxía"" al tiempu que quier ""solidarízase cola decana dimisionaria"", responsabilizando al Rectoráu y al Gobiernu del Principáu d'Asturies de la so dimisión ""porque siendo asina que la Xunta de Facultá aprobó, hai bien d'años, la Especialidá de Filoloxía Asturiana, desdexaron les sos obligaciones pa ponela en marcha"" facilitando asina ""el boicotéu sosteníu y foín d'un grupu d'antiasturianistes que tres d'abondos intentos fallíos, al cabu, dieron un golpe efeutivu escontra la llingua asturiana, oxetu de les sos rensíes"".

Asina, recuerden l'incumplimientu de la Carta Europea de les Llingües Rexonales o Minoritaries nel so artículu 8.e), polo que desixen-y a los poderes públicos ""la garantía de que la llingua asturiana pueda ser estudiada na nuesa universidá"".

Pela so parte, el Conceyu Universitariu pol Asturianu (CUPA) entiende que detrás de la decisión hai unos ""prexuicios acientíficos y ideolóxicos de cálter xacobín sobre la necesidá de que la Universidá d'Uvieu seya una Universidá de y pa la sociedá asturiana""."