Fai! pide la intervención del Rector "na marxinación del asturianu en filoloxía"

"El colectivu universitariu FAI! pidió esti miércoles la invervención del rector de la Universidá d'Uviéu, Vicente Gotor, ""na marxinación del asturianu en filoloxía"", en referencia a la supresión de la especialidá d'asturianu de la propuesta de títulu de grau de la Facultá de Filoloxía Asturiana.

Al traviés d'un comunicáu, FAI! pidió que ""Vicente Gotor esclarie si conoz los procesos d'estudiu ya implantación de los nuevos planes d'estudiu tres de la so negativa a pronunciase fai malpenes dos díes"", en referencia al últimu claustru, nel qu'ún representante de la organización exixó'l cumplimientu de los sos compromisos electorales pa cola llingua asturiana na Universidá.

Tamién solicitó que Vicente Gotor ""actue de forma decidida nel conflictu abiertu na Facultá de Filoloxía, respondiendo polos derechos y les realidaes científiques penriba de los intereses personales de los docentes qu'enxamás escondieron les sos postures antiasturianes"".

FAI! mostró tamién ""la so conderga total a la marxinación pal asturianu qu'aprobó la Xunta de Facultá de Filoloxía de la Universidá d'Uviéu"", y espresó ""l'apoyu públicu a Ana Cano, ex decana de la mesma, pola so defensa de la dignidá académica de la llingua asturiana, y pola so decisión de dimitir nel so cargu"".

La organización tien espublizao un cartel nel que se muestra una semeya de Félix Fernández de Castro, defensor de la enmienda que suprime la especialidá d'asturianu, al que se tacha de ""enemigu de la llingua asturiana y de tolos asturianos y asturianes"", mostrándolu baxo la conseña ""Non al apartheid llingüísticu na Universidá""."