Bloque por Asturies pide que se "devuelva la dignidá" a Filoloxía

"El Bloque por Asturies, énte la ""decisión incomprensible y ensin precedentes de la Xunta de la Facultá de Filoloxía d'asesinar y liquidar la Llingua Asturiana de la Universidá d'Uviéu"", desixó-y al ""presidente del Gobiernu asturianu, Vicente Álvarez Areces, y al rector de la Universidá, Vicente Gotor, que-y devuelvan darréu la dignidá a la Facultá de Filoloxía"".
Al traviés d'un comunicáu, la organización refirióse a la decisión de la Xunta de la Facultá de Filoloxía de suprimir la especialidá d'asturianu dientro del 'maior' Llingües Modernes, que compondría la futura titulación de grau, según la propuesta del Decanatu. La midida supunxo la dimisión de la decana, Ana Cano.

Pal Bloque ""el Gobiernu d'Asturies y el rector de la Universidá, nun puen permitir qu'un 'grupúsculu' de falsos científicos utilicen la Universidá d'Uviéu pa facer política de la manera más miserable y torguen por puru prexuiciu l'estudiu na Universidá Pública de la Llingua propia d'Asturies"".

""Si se niega a la Universidá, si se niega a la Facultá de Filoloxía, si se niega a la comunidá científica y universitaria, si se niega a los asturianos y asturianes la posibilidá de conocer, estudiar, investigar y afondar na realidá llingüística d'Asturies ta abriéndose la puerta a l intolerancia, l'incumplimientu de los derechos humanos, civiles y democráticos y asitia a Asturies a la puerta d'un conflictu de consecuencies imprevisibles"", señaló'l comunicáu.

El Bloque por Asturies mostró ""tol so apoyu a la ex decana de la Facultá de Filoloxía, Ana Cano, al so equipu y a tolos profesores que dende la coherencia y la dignidá, defendieron el carácter científicu y el llabor investigador de la Universidá d'Uviéu y supieron poner a la máxima institución académica d'Asturies per delantre de los intereses políticos y personales"".
La organización anunció que ""va movilizase, apoyar y participar en tolos actos de condena y refugu a esta clara violación de derechos, a esti ataque a la dignidá de la Universidá Asturiana"", y fai responsable al Gobiernu d'Asturies y al rector ""de les consecuencies de la decisión de la Xunta de la Facultá de Filoloxía"".

Dende'l so puntu de vista ""sólo la oficialidá de la llingua asturiana pue resolver la situación d'incumplimientu de los derechos humanos, civiles y democráticos que sufren los asturianos y asturianes"". ""Somos los ciudadanos y ciudadanes los que tenemos derechos llingüísticos, non los territorios o les propies llingües, y equí n'Asturies, en plenu sieglu XXI, tolos nuesos derechos llingüísticos tán pisaos y atacaos"", finó'l Bloque."