Dixebra saca una tirada de 500 botelles de sidra pol trentenu aniversariu

Sidra Fanjul y Dixebra celebren de manera conxunta’l trentenu aniversariu de la banda avilesina con una tirada de 500 botelles de sidra conmemoratives. Éstes lleven una etiqueta con un cachu de la lletra de ‘Canciu d’amor’ y van distribuyise ente coleutivos y persones que nesti tiempu sofitaron al grupu.

‘Pasaron los años, / consiguite al fin, / nel primer minutu, / ficistime feliz. / Siempre tas equí, / tráesme la gayola, / botellina sidre, / el mio amor / ye pa ti’ ye l’estractu de la lletra qu’apaez na etiqueta xunto col logu conmemorativu d’estos 30 años de Dixebra –diseñaos dambos por Eduardo Carruébano– na parte superior, y el lema ‘Trenta años de rock n’asturianu’, na inferior. La botella tamién incorpora una segunda etiqueta, la de Fanjul.

Ésta ye una de les sorpreses anunciaes pola banda con motivu del trentenu aniversariu. Con ella, Dixebra quier agradecer a tolos “colectivos y persones qu’a lo llargo d’estes tres décades d’actividá ininterrumpida collaboraron col grupu o apoyaron el so llabor”, polo que nun se van comercializar y va ser el propiu grupu l’encargáu de repartir les botelles ente ellos.

Videoclip de ‘Sigue’l tren’

Dixebra sigue cola so xira ‘Tour 87-17’, tres tocar esti vienres en Ribeseya y el sábadu en Llugo nel marcu del Conciertu les Lletres. Les próximes feches confirmaes son Comillas (Beltane Fest, 10 de xunu), Xixón (Conciertu pola Oficialidá, 17 de xunu), Tresona (23 de xunu, San Xuan) y Valmori (24 de xunu).

Otra manera, ta rematándose’l primer videoclip del proyetu ‘Dalgo nuevo, dalgo vieyo, dalgo emprestao’, dirixíu pol xixonés Javier Lueje. El cantar escoyíu ye’l nuevu, ‘Sigue’l tren’, y nel combínense imáxenes d’animación con otres reales.