Masa reclama "un puñetazu enriba la mesa" pola especialidá

"Quiero resultaos, non sólo bona voluntá, viaxes y cartes", demandó la diputada d'Izquierda Xunida (IX) a Genaro Alonso.

Concha Masa señaló saber de les xestiones de la Conseyería d'Educación y Cultura, que “yá vienen de vieyo”. Al so xuiciu, “el Gobiernu estatal nunca atopa'l momentu de tomar decisiones bones p'Asturies y los asturianos como quedó nidio colos presupuestos del Estáu”, pero tamién advirtió a Alonso que ye responsabilidá del Executivu nacional reivindicalo “con toles sos enerxíes. Lo contrario sería una auténtica tomadura de pelo”. 

“Esperamos que nun fine esta llexislatura ensin el reconocimientu de la especialidá d'asturianu nel enseñu. Quiero resultaos, non sólo bona voluntá, viaxes y cartes. Trensmita al Principáu que esto ye una responsabilidá del Gobiernu”, incidió Masa na Xunta Xeneral mientres llevaba una camiseta de la Xunta pola Defensa de la Llingua Asturiana que demandaba la oficialidá del idioma.

La diputada d'IX recordó-y tamién, aprovechando la celebración de la Selmana de les Lletres Asturiana, que la coalición “nun ve avances consistentes” na situación del idioma. Asina, mencionó la situación de l'Academia de la Llingua Asturiana, demandando que se resuelva'l so reconocimientu institucional, y l'ausencia de voluntá na normalización, como amuesa la falta de cartelería n'asturianu.