La Xunta pola Defensa la Llingua critica la decisión de la Facultá de Filoloxía

"La Xunta pola Defensa de la Llingua Asturiana llamenta, pente medies d'una nota prensa, el resultáu de la votación del martes na Facultá de Filoloxía, votación que dio como resultáu la dimisión de la qu'hasta entós yera la decana de la Facultá de Filoloxía de la Universidá d'Uviéu; Ana María Cano.

Dende la organización, camienten que na propuesta del equipu decanal ""la Filoloxía Asturiana tenía'l sitiu dignu que se venía reclamando dende hai venti años"", y que, pela contra, la victoria nes votaciones de la enmienda presentada pol profesor Félix Fernández de Castro ""vuélvenos a los tiempos escuros de la Universidá cuando la intolerancia y el prexuiciu valtaron una vez y otra tolos intentos de que l'asturianu tuviere presente de manera digna nos estudios universitarios de Filoloxía"".
La Xunta quier recordar que ""la Universidá d'Uviéu ta obligada, como máxima institución académica d'Asturies, a protagonizar l'estudiu científicu y el llabor investigador sobre la nuestra realidá llingüística"", polo que ""negar qu'haya una titulación d'Asturianu nos planes oficiales d'estudiu cuando sí l'hai d'otres titulaciones supón nega-y a la nuestra cualquier salida aceptable"".

D'otru llau, y entrando a valorar la enmienda presentada pol profesor Fernández de Castro, camienten que ""negar la entrada de la Filoloxía Asturiana pa evitar la politización de la universidá, ye una muestra, precisamente, de la politización de dellos sectores universitarios que nun almiten la normalidá y que nel estudiu de les llingües minoritaries ven una amenaza pal so estatus personal"". Asina opinen que ""ye una vergüenza pa la Universidá d'Uviéu, pal autor de la enmienda y pa los profesores que votaron a favor d'ella o s'abstuvieron, que nuna institución onde tenía que pesar el criteriu científicu y académicu mande más el provincianismu acérrime, la inorancia y la politización más demagóxica"".

Pa finar, la Xunta pola Defensa de la Llingua Asturiana quier espresar el so apoyu a la ex-decana de la Facultá de Filoloxía, Ana María Cano; asina como al so equipu y a tolos profesores que ""mantuvieron la dignidá de la institución apoyando la propuesta"". Al tiempu que-y desixen al Gobiernu asturianu y al actual rector de la Universidá d'Uviéu, Vicente Gotor, que condenen ""esti determín inaceptable que dexa fuera de la Universidá'l mayor patrimoniu cultural d'Asturies""."