Unidá Nacionalista Asturiana califica de "vuelta a les cavernes" la eliminación de los estudios d'asturianu en Filoloxía

"La Xunta Executiva d'Unidá Nacionalista Asturiana aconceyóse de forma urxente pa valorar la votación na Facultá de Filoloxía na que se decidió eliminar los estudios d'asturianu y que provocó la dimisión de la decana de la facultá Ana Cano.
El so voceru, Faustino Zapico, afirmó que dende la federación nacionalista ""condenamos enérxicamente un fechu que supón una auténtica ofensiva troglodita que tien como oxetivu la eliminación ensin mázcares nin matices, de la llingua y la cultura asturiana a traviés d'una vuelta a les cavernes del neofranquismu españolista"".

El voceru d'UNIDÁ afirmó amás que ""ye gravísimo que'l votu de 34 persones que respuenden a intereses sectoriales y dacuando mercenarios, y en concreto de 2, Pedro Manuel Suárez y Félix Fernández de Castro, les dos persones que presentaron la propuesta, puean roba-yos a los asturianos y asturianes la posibilidá de cursar estudios na so llingua y torguen la formación del profesoráu de llingua asturiana, y más cuando hai años la Xunta Xeneral nel so conxuntu pidió espresamente por unanimidá la implantación de los estudios de llingua asturiana na Facultá de Filoloxía"".

Dende UNIDÁ señálense tamién como culpables a los órganos de gobiernu de la Universidá d'Uviéu, que nun acaben de dar el pasu de la dignificación decidida de la llingua asturiana, y principalmente al Gobiernu asturianu, que caltien la normalización de la llingua nuna situación de provisionalidá, precariedá ya indefinición que faen posible l'envalentonamientu y el rearme argumental de sectores enquistaos na sociedá asturiana que pretenden desaniciar dende los prexuicios y el sectarismu cualquier elementu diferencial asturianu.

En cualquier casu dende la Xunta Executiva d'UNIDÁ, señalo Zapico, decidióse ""amosar el nuesu apoyu y solidaridá con Ana Cano"", al tiempu que faen ""un llamáu a la respuesta contundente de tolos sectores organizaos que se consideren defensores de la llingua énte esti verdaderu atracu a la sociedá asturiana nel so conxuntu"". Al empar, demanden ""una respuesta clara y rápida pela parte del nuevu equipurectoral, y en concreto del rector Vicente Gotor, que se comprometió na campaña a la defensa de los estudios de llingua asturiana"", desixendo ""d'una vegada la declaración d'oficialidá de la llingua asturianu, la única midida real que pue tornar la esistencia de fechos tan llaceriosos comos estos""."