Ana Cano: "Nun quiero tar al frente d'una xunta que torgue la presencia l'asturianu na Universidá"

"Ana María Cano fizo pública esti martes la so decisión d'abandonar el so puestu de decana de la Facultá de Filoloxía de la Universidá d'Uviéu, dempués de que s'aprobara la enmienda que torgaba l'aprobación del nuevu estudiu de grau de Llingües Modernes, onde s'inxertaba dafechu la enseñanza d'asturianu.

En declaraciones a Asturies.com, la presidenta de l'Ademia de la Llingua Asturiana sorrayó la so decisión irrevocable d'abandonar el decanatu de la Facultá, cargu qu'aceutara ""siempre que nun fuera en contra de los sos principios"", llende que foi perpasada dempués de que saliera alantre la enmieda presentada pol profesor Félix Fernández de Castro.

La propuesta d'estudiu de los nuevos títulos de grau qu'ufiertaba l'equipu decanal encabezáu pola tamién presidenta de l'Academia de la llingua Asturiana inxertaba una titulación de Llingües Modernes na que sumaríen un total de 120 créitos nuna combinación de Llingua A (72 créitos) y Llingua B (48 créitos). Na propuesta decanal, la llingua asturiana podría optar a formar parte de cualesquier de los dos bloques, n'igualdá de condiciones con llingües como'l francés o l'inglés, pudiendo amás escoyer l'asturianu como materia optativa con 48 créitos los estudiantes de les demás titulaciones.

Contra la propuesta decanal presentárense delles enmiendes, delles parciales y otres a la totalidá. D'ente elles namás salió alantre la enmienda parcial presentada pol profesor Félix Fernández de Castro, que plantegó que l'asturianu nun apaeza nel plan d'estudios de la Facultá de Filoloxía. Nel alderique encesu que se xeneró al rau de la presentación de la propuesta, namás la propia decana y el tamién profesor Ramón d'Andrés Díaz, defenderon los antecedentes llegales y académicos de la llingua asturiana nel ámbitu académicu.

A la fin, la enmienda de De Castro recibió 34 votos a favor y 30 a la escontra, asina como 7 en blanco, forzando la rectificación de la propuesta d'estudios retirando l'asturianu de la mesma.

Esti resultáu forzó la dimisión d'Ana Cano, que consideró nun tener ""la confianza de la Xunta de la Facultá"", al tiempu que refugó ""tar al frente d'una Xunta que torgue la presencia l'asturianu na facultá"". La decana cumplió asina la so alvertencia de dexar el decanatu en casu de que se tomaren decisiones contra los sos principios."