Avilés sigue ensin ordenanza d’asturianu un añu depués de l’aprobación de la so redaición

Somos Avilés va insistir esti xueves na Ordenanza Municipal pal Usu de la Llingua Asturiana nel Conceyu d’Avilés un añu depués de l’aprobación de la so redaición. En febreru, la conceyala Yolanda Alonso afirmara que taría pa esti Plenu o’l de mayu.

El 20 d’abril del 2016, el partíu nel gobiernu, el PSOE, xunto a Izquierda Xunida (IX), Ciudadanos y Ganemos sofitaron la propuesta de Somos Avilés pa qu’Avilés contara cona una ordenanza d’asturianu, atopando la única oposición del Partido Popular (PP). “Paeznos qu’un añu ye tiempu suficiente pa la ellaboración y redaición d’esta ordenanza y cumplir el mandatu emanáu d’esti Plenu”, apunten dende Somos, formación que recuerda que treslladara d’aquella a los grupos municipales una propuesta adaptada a la realidá sociollingüística del conceyu sobre la que trabayar y facer modificaciones.

Asina, el xueves va entrugar al PSOE ‘¿en que situación s’alcuentra nesti momentu la ellaboración de la mesma?’ y ‘¿cuándo va presentase a esti Plenu pa la so aprobación definitiva?’. El compromisu del equipu de gobiernu, en pallabres de la conceyala de Promoción Social y Cultura nel Plenu de febreru, yera que tuviera pal del xueves o’l de mayu: “Tamos trabayando na ordenanza d’asturianu y la idea ye llevala al Plenu del mes d’abril o mes de mayu. Dalgunes vegaes trabayamos”, retrucó Alonso al edil de Somos, Xune Elipe.