De la Concha afirma que la RAE "defende'l billingüismu"

"El direutor de la Real Academia Española (RAE), el maliayu Víctor García de la Concha, recordó n'Uviéu que l'Academia siempre tien defendíu'l billingüismu, señalando asina mesmo que'l conflictu ente'l castellán y les otres llingües ye de calter puramente políticu.

""Los políticos tienen d'iguar el problema que-yos xenera l'aplicación del desarrollu estatutariu de la cooficialidá de les llingües"", afirmó De la Concha, enantes d'entrar na xunta que decidirá'l próximu Premiu Príncipe d'Asturies de les Lletres. L'académicu apuntó tamién que ""delles veces"" son los políticos los que motiven coles son aiciones ""esos problemes"" ente les llingües cooficiales.

""La RAE tien siempre defendíu'l billingüismu"", aseguró De la Concha, añadiendo que la RAE tien una ""perbona rellación"" cola Academia Galega, l'Insitututo d'Estudios Catalanes o la EuskoTzaindia. ""Poro nun hai nengún problema ente les llingües, sacante l'aplicación de los estatutos"".

No que cinca al manifiestu en defensa del castellán robláu por una ventena d'intelectuales, el direutor de la RAE afirmó que ye ésta una iniciativa ""llibre"" d'un grupu de ciudadanos. ""Dellos militantes de partíos políticos que tán apuntando correctamente"". Pa finar, De la Concha sorrayó otra vuelta que'l ""problema"" plantéguenlu los propios políticos, non el pueblu. ""son los políticos los que tienen de resolver estos problemes, porque tán pa sirvir al pueblu y non pa xenera-y problemes"".

Noticies rellacionaes:

Intelectuales españoles roblen un manifiestu en defensa del castellán "