Los grupos alcuerden eliminar les llimitaciones que torgaben la disolución de la Cámara

"Los grupos parlamentarios qu'integren la Ponencia Estatutaria de la Xunta Xeneral del Principáu d'Asturies, alcordaron por unanimidá nel aconceyamientu del llunes, que la reforma estatutaria recueya la posibilidá de disolver la Cámara y convocar elecciones en cualesquier momentu de la Llexislatura.

D'esta manera van eliminase les llimitaciones a la disolución qu'apaecen nel actual estatutu y que torgaben la disolución del Parlamentu nel primer y últimu añu de llexislatura.

Asina lo esplicaron al acabar el conceyu los representantes de los tres grupos Fernando Lastra (PSOE), Ovidio Sánchez (PP) y Jesús Iglesias (IX-BA-Verdes).

Nel aconceyamientu los grupos trataron la parte del estatutu dedicada a la regulación de la Xunta Xeneral, centrando la so atención nos procesos electorales. Asina, PP y PSOE dexaron claru'l so alcuerdu no tocante a que la llei electoral tenga d'aprobase por mayoría cualificada en llugar de mayoría absoluta, como cuenta l'actual estatutu, aspeutu nel qu'IX-BA-Verdes nun ta d'alcuerdu.

Fernando Lastra afirmó que'l so grupu ""nun ye partidariu"" d'aumentar el númberu de diputaos, anque declaró que la propuesta nun se refier a un aumentu, sinón a la eliminación de les llendes establecíes nel actual testu, que ta ente 35 y 45. Tampoco PSOE y PP comparten la propuesta d'IX-BA-Verdes d'eliminar les tres circunscripciones electorales y que'l nuevu Estatutu espeye una circunscripción única. No que cinca al ""encaxe"" del pautu social y la participación institucional de los axentes nel estatutu, el PSOE presentó una propuesta que cuenta col apoyu del PP, anque non d'IX-BA-Verdes, que considera que'l compromisu de participación de les organizaciones sociales nun queda bien reconocíu nel testu.

Dichu testu propón, según esplicó Fernando Lastra, un nuevu artículu nel que se reconoz el valor del diálogu social nel so primer apartáu; un segundu apartáu que tien que ver cola promoción por parte de los poderes públicos de la participación de los axentes sociales y el tercer apartáu nel que s'eleva'l CES a rangu estatutariu. Ovidio Sánchez indicó que'l so grupu comparte la propuesta del PSOE.

El próximu llunes la ponencia va tratar el capítulu de la regulación del presidente de la comunidá autónoma."