La Bandina completa'l camín

"Ún de los grupos más activos nos últimos años no que ye la escena folk asturiana ye ensin dubia La Bandina. Discos, collaboraciones, versiones, videoclips y sobre too munchos conciertos ficieron que'l son del grupu tuviere bien presente perdayuri. Espublicen agora'l so tercer discu, ""13"", col que confirmen la evolución técnica y musical de la banda dende aquel primer discu ""Pa Bail.lar"".

Si por dalgo se pue caracterizar esti grupu nos últimos años ye una busca permanente del so soníu. Preba d'esti procesu/evolución tiense namás con facer comparanza ente'l so primer discu y esti ""13"". Esti analís diba espeyanos que la base instrumental sigue tando ehí, saxu, gaita, zanfona, curdión diatónicu y percusión variada, pero son trataos d'una manera bien diferente nun y otru momentu. La gaita y el saxu nun van tan pegaos al curdión y la zanfona, sinón qu'una gran bayura melódica faen que los soníos se crucen en distintes voces, llegando a veces a ser daqué enguedeyáu siguir la pista del tema. Aprovéchense más les dinámiques de los instrumentos, diendo arriba y a abaxo según lo pida'l tema, y nun hai problema por ceder el protagonismu a ún a otru instrumentu según convenga. Amás, les percusiones foron soltándose, y en ""13"" la variedá rítmica y sonora ye total. Esta evolución ya se notaba nel discu anterior ""..de romandela"", pero nesti últimu confírmase, La Bandina apuesta por arreglos sobre pieces tradicionales con retoques mui personales, llonxe de lo habitual nos grupos folk asturianos, pero ye que tamién la instrumentación del grupu nun ye la más habitual. Nun se pue dexar de solliñar la influyencia a lo llargo del cd de música de grupos franceses como Blowzabella o Skolvan, tirando dacuando a son centrueuropéu a mou de fanfarria. ¿Y por qué tanta influyencia foriata? ¿pue dicir daquién que s'escaecieron de lo d'equí?. Non, la so música asturiana tien una influyencia foriata clara, pero ésta pue paecer que rescampla más porque asina nunca nun se fizo n'Asturies. ""13"" oficializa dalguna manera que nel folk asturianu, na música de reellaboración, hai más influyencies que les del arcu atlánticu, dalgo qu'a parte de La Bandina vienen faciendo otros grupos como Los Ciquitrinos.

Pero nel discu tamién se nota que la evolución pasó tamién polo músicos y la integración de los mesmos. Los miembros más veteranos del grupu, Merce Santos (Zanfona), Santi Caleya (Gaita Asturiana, Saxo Sopranu), David Varela (Curdión Diatónicu, Voz), Juanjo Diaz (Tambor Asturianu, Caxón, Percusiones) Pablo Pumarada (Bodhram, Darbouka, Congues) y Dani Jimenez (Baxu) amuesen otra vuelta que son mui capaces de tocar xuntos, pero más interesante ye que los metales finalmente intégrense dafechu nel soníu de La Bandina, dexando de ser una amiestu a temes que taben concebíos ensin metales, colo que Toño Gomez (Trombón, Bombardino) y Agustin Lara (Trompeta, Fliscorno) son ya una parte más de la maquinaria. El grupu tamién xugó con varies collaboraciones, el bon amigu del grupu Alain Pennec, la bagad ""Kevrén Alré"", l'arpa de Frédéric Bougin, y ya pel país, Xosé Antón ""Ambás"" punxo voz a una danza y la cantante de ""Pauline en la Playa"", Alicia Álvarez, apega la so voz perfectamente al curdión de David Varela nel ""Valse coxu"".

En resume pue dicise que La Bandina con esti discu nun ye que llegara al final del so camín, ¿daquién llegó?, pero sí polo menos algamaron una meta, un oxetivu conceptual al que los miembros teníen munches ganes de llegar. Agora son los sos siguidores y aquellos que los sientan per primer vegada los que tienen que dictar sentencia sobre esti camín de La Bandina, ""13"" ta esperándolos."