FAI! valora la xestión de Vicente Gotor

"La organización estudiantil universitaria Fai!, con representación nel claustru de la Universidá d'Uviéu, considera ""mui probes"" los entamos del nuevu rector uvieín, Vicente Gotor, no que cinca a la promoción del asturianu.

El colectivu diz que'l responsable de la Institución ""reduz la política llingüística, a la presencia del asturianu, xunto col inglés, na páxina web de la Universidá y a que se permita a los investigadores l'usu del idioma asturianu nos sos trabayos d'investigación, siempre acordies cola calidá certificada de los mesmos"".

Fai! pronuncióse nesti sen nuna nota prensa, dempués d'un conceyu del claustru, nel que los sos representantes entrugaron al rector polos sos ""compromisos"" na campaña electoral sobre'l tema del asturianu. Concretamente, el colectivu ""encamentó al nuevu Rector a que se pronunciare sobre les necesaries midíes qu'han desendolcase pa la normalización llingüística del idioma na universidá asturiana, l'usu alministrativu, la visibilización esterna de la llingua en toles estayes de la institución, asina como pola urxente falta de resolución del conflictu coles titulaciones de Filoloxía Asturiana y el títulu d'espertu en Llingua Asturiana en Maxisteriu"".

""La rempuesta per parte de Gotor pasa por aparcar, pel momentu, el tema de les nueves titulaciones de filoloxía y maxisteriu énte la reforma y adautación al EE d'ES'ES (Espaciu Européu d'Educación Superior) d'estos títulos propios y, en resume, reduz la política llingüística, a la presencia del asturianu, xunto col inglés, nel web de la Universidá y a que se permita a los investigadores l'usu del idioma asturianu nos sos trabayos d'investigación, siempre acordies cola calidá certificada de los mesmos"", señala'l testu.

Fai! reprocha que nun s'esclarien ""cuestiones tan importantes como si va haber una planificación global en materia llingüística col so presupuestu asignáu, qué decisiones se van tomar pa evitar cualquier tipu de discriminación por mor del usu de la llingua asturiana, qué posición va defender el Rector no tocante a los títulos o cuándo van entamar a ponese en marcha eses midíes"".

Fai! considera ""mui probes estos entamos del nuevu equipu rectoral no que cinca a la presencia normal del idioma propiu d'Asturies na institución universitaria"", pero piensa ""qu'entá ta a tiempu d'iguar la problemática llingüística na que vive la Universidá pa que se garantice y promueva l'usu alministrativu y académicu del asturianu en tolos ámbitos, pa que la visualización del idioma na imaxe corporativa interna y esterna de la Universidá seya una realidá, pa que se fomente y esparda la llingua al traviés d'estudios, congresos, investigaciones..."".

De la mesma manera pide que ""se ponga fin, d'una vegada, a la situación irregular na que se topa la Filoloxía Asturiana y el títulu d'especialista en Llingua Asturiana de Maxisteriu"".

Pa finar l'asociación estudiantil ""va siguir mui de cerca esti asuntu dende dientro del Claustru, entrugando y desixendo que'l Rector cumpla colos sos compromisos establecíos durante la campaña electoral pa llograr una universidá verdaderamente asturiana que fomente y protexa como tien que ser el nuestru patrimoniu llingüísticu""."