Nava acueye un Taller d'Asturianu basáu nel coaprendizaxe

Ta abiertu a tolos niveles y la matrícula, de baldre, va poder formalizase hasta'l día 26.

El Serviciu de Normalización Llingüística de la 'Comarca la Sidra' entama, en collaboración col Conceyu de Nava, esti Taller d'Asturianu destináu a toles persones intereses n’ampliar los sos conocimientos sobre llingua asturiana independientemente del so nivel, al tar enfocáu dende una perspeutiva fundamentalmente práutica y de fomentu del coaprendizaxe. En concreto, busca "crear un espaciu de deprendizaxe y perfeccionamientu de les habilidaes comunicatives en llingua asturiana, tanto nel planu d’espresión y comprensión oral como escrito".

Les sesiones van tar dividíes en dos partes, tando la primera enfocada na espresión escrita. Asina, partiendo de les producciones del alumnáu, éstes van correxise pa, al empar, repasar les normes ortográfiques y gramaticales. D'esta forma van ampliase los recursos sintácticos y de vocabulariu de los participantes.

D'otra miente, va haber una parte oral, cola intención de que los alumnos y alumnes quiten mieos a la hora d’intentar enfrentase n’asturianu a les situaciones comunicatives más diverses, corrixendo errores y buscando un modelu natural y prestosu de llingua falada. Nel taller va dase atención, igualmente, a les producciones culturales actuales en llingua asturiana, asina como a tolos elementos sociollingüísticos que condicionen el so desarrollu y evolución históricamente y n’actualidá.

Hasta'l 28 de xunu

El Taller de Llingua Asturiana va ponese tolos miércoles, hasta'l 28 de xunu, de 17.30 a 20 hores nos llocales del Conceyu en La Llaguna. La inscripción ye de baldre dafechu y pue facese al traviés per teléfonu nel 985.71.60.08 (horariu de mañanes) y nos correos electrónicos info@ayto-nava.es y normastur@lacomarcadelasidra.com hasta'l día 26, xornada na que comiencen les clases.