"Los responsables socialistes nun recueyen el sentir de la FSA"

"El Conceyu Abiertu pola Oficialidá (CAO) aseguró esti llunes que delles agrupaciones locales del PSOE tienen presentaes enmiendes, de cara al congresu rexonal de la Federación Socialista Asturiana, previstu pa xunetu, a favor de la reconocencia de la oficialidá de la llingua asturiana nel Estatutu d'Autonomía.

Asina lo dixo Ernesto Suárez, miembru del CAO y voceru de la Xunta pola Defensa de la Llingua Asturiana, dempués de que finara la concentración que'l coleutivu tenía convocada énte la Xunta Xeneral del Principáu, coincidiendo col aconceyamientu de los miembros de la ponencia estatutaria.

Suárez aseguró que nel próximu boletín de la FSA, van dase a conocer los nomes de delles agrupaciones locales que tienen presentao enmiendes de cara al congresu, ""delles meyorando'l tratamientu del asturianu y otres proponiendo direutamente la oficialidá"". El voceru aseguró que'l CAO tien conocencia d'ello, anque nun quixo facer públicu'l nome de les agrupaciones que presentaríen estes propuestes, ""anque va ser de dominiu públicu nos próximos díes"".

Dende'l so puntu de vista, ""ye un datu importante, non porque pensemos que la direutiva de la FSA vaya a ceder na so negativa a reconocer la oficialidá, pero sí porque amuesa que dientro del PSOE hai xente favoratible"". ""Los responsables socialistes nun recueyen el sentir mayoritariu de la sociedá, inda la FSA"", añadió.

D'otru llau, Suárez tamién informó de que'l CAO tien yá recoyíes na so páxina web doilacara.net más de 2.500 semeyes de persones que posen col cartel ""Yo doi la cara pola oficialidá/eu dou a cara pola oficialidá"". La campaña, qu'entamó a metanes de xunu, siguirá demientres dure'l procesu d'ellaboración del estatutu d'Asturies."