L'Academia vasca presenta'l primer diccionariu de términos lliterarios

"Euskaltzaindia, l'Academia de la Llingua Vasca presentó ""Literatura termino en hiztegia"", el primer diccionariu que s'espubliza sobre términos lliterarios en ""euskara"", col envís de recoyer y normalizar el léxicu que s'emplega y s'emplegó nesti idioma nos testos de crítica, historia y teoría de la lliteratura.

El llibru, que forma parte de la coleición Hiztegiak de l'Academia de la Llingua Vasca, foi ellaboráu pola Comisión d'Investigación Lliteraria d'Euskaltzaindia y publícase col patrociniu de la BBK.

La presentación foi entamada pol presidente d'Euskaltzaindia, Andrés Urrutia; Jean Haritschelhar, responsable de la Comisión d'Investigación Lliteraria; Lourdes Otaegi, secretaria d'esta comisión y Gorka Martínez, responsable de la Fundación BBK. El diccionariu ye'l resultáu de 17 años de trabayu por parte dela Comisión d'Investigación Lliteraria d'Euskaltzaindia.

Dende qu'ésta nació, nel añu 1991, vióse la necesidá d'investigar y afitar la terminoloxía que se tien d'emplegar nel ámbitu lliterariu. Asina, yá dende los primeros aconceyamientos de la comisión, entamó a aprobase la cadarma y llista d'entraes del diccionariu, asina como'l métodu de trabayu que se diba emplegar.

Esti diccionariu pieslla un ciclu pa la Comisión d'Investigación Lliteraria, que quier agora poner el so trabayu en manes de la comunidá que trabaya nel ámbitu de la lliteratura vasca, a sabiendes de la importancia que tien el fechu de cuntar con un léxicu lliterariu especializáu y precisu."