La Escuela de Música de Llangréu celebra'l fin de cursu

"Esti sábadu 21 de xunu la Escuela de Música Tradicional de Llangréu celebra'l so tradicional conciertu de fin de cursu, que tendrá llugar nel auditoriu de cámara del conservatoriu Valle del Nalón a partir de les 17.00 hores.

La Escuela de Música Tradicional vien desarrollando, col sofitu del Ayuntamientu de Llangréu y la Conseyería d'Educación y Ciencia, un bultable llabor d'espardimientu al traviés de los sos cursos y talleres. Ente estos últimos rescamplen nesti añu'l taller de ""Hestoria de la Música Folk n'Asturies"", ""Xornada d'estudiu de la Música Tradicional del País Vascu"", ""Taller de téunica vocal pa intérpretes de Canción Asturiana y pandereteres"" y ""Mantenimientu del tambor asturianu"". Impartíos por Alberto Ablanedo, Maiteder Olano, Iñaki Xavier Olano, Ana Abio, Begoña Calleja, Carlos Do Viso y Manuel Duran, respeutivamente.

Amás, la Escuela sigue alantre colos cursos entamaos de Xipla, impartíu por Luis Mondelo; Zanfoña con Héctor Braga, curdión con Xose Ramón G. Navia, Aniciu a la música tradicional con Fani Moro, Pandereteres con Laura Ruiz, Canción Asturiana con Begoña Calleja. Asina como los tradicionales cursos de Gaita con Chus Solís, Mecánica de la gaita con Pelayo Fernández o Tambor asturianu con Chema Fombona, amás de Banda Gaites, Pareya y Bandina."