El Plan de Tresporte a los Llagos amplíase esta Selmana Santa

Pasa de los cuatro día habituales a nueve.

Dende primer vegada dende que se punxera en marcha nel 2005, el Plan de Tresporte a los Llagos de Cuadonga nun va desendolcase namái nos cuatro díes festivos de Selmana Santa. Esti añu, depués de los atascos que se vivieron en feches próximes, los últimos coincidiendo cola festividá por San Xosé na Comunidad de Madrid y Extremadura, va ampliase a nueve díes.

Asina, dende esti sábadu y hasta'l Domingu Santu, día 16, va prohibise l'accesu de vehiculos particulares n'horarios diurnos. Otra novedá esti añu va ser l'endurecimientu de les esixencies de los autobuses que cubren el trayeutu, que van ser menos contaminantes, cola mira de da-y más proteición a una contornada protexida, allugada nel Parque Nacional de Los Picos de Europa.

Asina, nel periodu de regulación, l’accesu va tar llendáu a aquellos tresportes coleutivos –tanto venceyaos al Plan de Tresporte como los que lleven grupos de turistes– que tengan, polo menos, la calificación enerxética Euro 4, lo que se traduz nuna mengua sustancial de les emisiones contaminantes. Nel futuru, el Gobiernu quier frenar l’accesu a vehículos más contaminantes de forma permanente, esixendo, inclusive, teunoloxíes más avanzaes.

Restu de feches previstes

El Plan de Tresporte de los Llagos va tornar a activase esti 2017 nes pontes festives del 1 de Mayu, el Pilar y la Constitución, a los qu'hai que sumar les feches de branu. El calendariu, con vocación de ser estable, va ser revisáu pol Gobiernu nel casu de necesidá cola mira de siguir introduciendo meyores.