Los Ventisiete alcuerden eliminar les sanciones a Cuba

"Los ministros d'Asuntos Esteriores de la Unión Europea algamaron anueche un alcuerdu pa eliminar les sanciones diplomátiques qu'impunxeron a Cuba nel 2003 - poles midíes de represión coles que les autoridaes cubanes detuvieron a 75 disidentes - según anunció'l ministru d'Asuntos Esteriores y de Cooperación, Miguel Ángel Moratinos.

Sicasí, y pa contentar a los países más contrarios al llevantamientu de les sanciones, el Conseyu de la UE va facer una evaluación de la nueva etapa de diálogu cola islla dientro d'un añu.

La eliminación de les sanciones supón una vitoria diplomática pa España, yá que siempre sostuvo que la so aplicación nun valió pa lliberar a nengún disidente y, hasta fueron ""contraproducentes"", en pallabres del ministru. Tamién la Comisión Europea y dellos de los sos miembros como Alemaña, Francia, Italia, Dinamarca, Portugal, Grecia y Chipre apoyaron esta posición nes negociaciones de los Ventisiete previes al alcuentru d'ayeri.

República Checa - que tien una política hacia la islla asemeyada a la d'Estaos Xuníos - y Países Baxos, Reinu Uníu y Suecia, en menor midida, amosaron les sos reserves nes negociaciones. A los contrarios al llevantamientu de sanciones unióse, nel últimu momentu y por sorpresa, Alemaña al solicitar el pasáu llunes un aplazamientu de la discusión por supuestes diferencies internes nel so Gobiernu de coalición.

La decisión de los Ventisiete va formalizase'l próximu llunes nel Conseyu de ministros d'Agricultura, col envís de qu'entren en vixencia ""darréu"", según precisó en rueda prensa Moratinos. Según el ministru, la Unión encamienta a L'Habana a facilitar l'accesu a les cárceles d'organizaciones humanitaries internacionales y pide la lliberación de ""tolos presos políticos"", incluíos los deteníos na operación del 2003.

De la mesma manera, los Ventisiete ofrecen a les autoridaes cubanes un diálogu onde se traten tolos temes d'interés común, incluíos la situación de los Derechos Humanos na islla y el procesu de reformes que vive Cuba. La ufierta va completase cola disposición de los Ventisiete a recuperar los instrumentos de cooperación pal desarrollu.

La UE tamién entamará un diálogu con tolos sectores de la sociedá civil y de la oposición, anque'l ministru sorrayó que ""lo importante ye trabayar coles autoridaes cubanes porque son les que, a la fin, tán desarrollando esti procesu de reformes"". Amás, el Conseyu confirma'l so compromisu renováu cola posición común de 1996 y reconoz que'l Gobiernu cubanu entamó cambios, animando al presidente, Raúl Castro, a siguir con ellos."