El Principáu apoya siguir cola paralización de la pesca del bocarte

"El direutor xeneral de Pesca del Gobiernu del Principáu d'Asturies, José Ignacio Cabrera Calvo-Sotelo, asistió'l xueves en Madrid a un conceyu convocáu pol Ministeriu de Mediu Ambiente, Mediu Rural y Marín pa fixar el posicionamientu d'España sobre la situación de l'anchoa nel Cantábricu.

Les Alministraciones estatal y autonómica alcordaron siguir cola paralización de la pesca del bocarte nel segundu semestre del 2008 y decidir el so posicionamientu de cara al 2009 una vez que se conozan los resultaos de los informes científicos de la campaña de seronda.

La postura asturiana coincide col alcuerdu mayoritariu algamáu nel conceyu de Madrid, nel que tamién hubo representación del sector. Nel casu d'Asturies, esta decisión afeuta a seis barcos de cercu.

Los informes científicos de la campaña de primavera aconseyen siguir cola paralización de la pesca del bocarte no que queda d'añu, conseyos que fueron asumíos pol sector y poles alministraciones p'aplicales a lo llargo d'esti periodu, según informó'l Principáu al traviés d'una nota de prensa.

La siguiente evaluación científica va ser na seronda, momentu nel qu'España va tener que pronunciase otra vuelta énte la Unión Europea pa que se tenga en cuenta la so opinión na toma de decisiones pal añu 2009. Los citaos informes incluyen gran variedá de datos qu'evaluen el riesgu de que se piesque, anque la decisión final correspuende-y a Bruseles."