Rajoy noma a De Cospedal secretaria xeneral del PP

"La presidenta del PP de Castiella La Mancha, María Dolores de Cospedal, confirmó na mañana del xueves que compatibilizará'l so cargu como secretaria xeneral del partíu col de presidenta de los populares en Castiella La Mancha.
Nuna entrevista en RNE, Cospedal dixo que-y agradecía ""enforma"" a Mariano Rajoy la ""confianza"" y la ""responsabilidá"" que depositó nella y anunció que va siguir siendo la presidenta del PP en Castiella La Mancha, y la candidata a les elecciones autonómiques, dalgo que, aseguró, yera ""mui importante"" pa ella.

La que va ser la socesora d'Ángel Acebes na Secretaría Xeneral comprometióse a facer ""tolo que puea pa tar a l'altura de les circunstancies"" si, como s'espera, ye confirmada la candidatura de Mariano Rajoy nel XVI Congresu Nacional del PP qu'entama en Valencia.

De Cospedal nun quixo valorar si'l nuevu cargu que va ocupar va poder ayudala nes elecciones que van celebrase nel 2011 y sorrayó que ""yera un día d'agradecimientu"". Tampoco confirmó si la ufierta de Rajoy fízose hai tiempu. ""Les conversaciones privaes, privaes son"", llimitóse a responder.

No que cinca a les persones que'l presidente popular propunxo p'acompañar a De Cospedal na Executiva del partíu, - con Ana Mato como vicesecretaria d'Organización, Esteban González Pons en Comunicación y Javier Arenas na vicesecretaría Territorial -, la futura secretaria xeneral destacó que ye ""un magníficu equipu""."