García Hoyuelos presenta'l so proyeutu nuevu en toles llingües ibériques, ‘Aire, fuego y deseo’

El burgalés nacíu en Basauri, Juan Carlos García Hoyuelos, presenta esti vienres en Xixón el so proyeutu poéticu-musical nuevu con traducciones en toles llingües ibériques, siguiendo’l mesmu camín que con ‘Se lo dije a la noche’. L’actu va contar cola actuación de Toli Morilla, que collabora interpretando 'Magar la distancia'.

Berta Piñán, Pablo Texón, José Alfredo Hernández Rodríguez, Roberto González-Quevedo y Amadeu Ferreira participen tamién nesta iniciativa tornando al asturlleonés los 25 poemes que componen ‘Aire, fuego y deseo’, una obra más intimista que l’anterior del escritor castellanu. El llibru, espublizáu l’añu pasáu, vien acompañáu amás por un CD con 33 pieces interpretaos por artistes o bandes na so llingua propia, como ye’l casu de Morilla, los lleoneses Tarna o la estremeña Manuela Elena.

L’Academia de la Llingua Asturiana (ALLA), asina como les asociaciones Iniciativa pol Asturianu, la lleonesa Faceira y la zamorana Furmientu, collaboren nesti proyeutu-musical que güei se presenta en Lleón (19 hores, Librería Artemis) y mañana en Xixón. La organización cívica asturiana encárgase de la organización del actu, que va celebrase a les 21 hores en La Caja de Músicos, asitiada na Ruta, na cai Bon Sucesu.

L’eventu va contar cola presencia y llectura de tolos autores y collaboradores del llibru na fastera asturiana, amás de con Morilla, que va protagonizar una actuación musical. Pa finar, va entamase una folixa abierta a toles persones interesaes.

Cursu de creación lliteraria

Iniciativa pol Asturianu celebra esta tarde’l pieslle del cursu de creación lliteraria qu’entamara n’ochobre Vanessa Gutiérrez. “Tamos mui satisfechos del resultáu d'esti cursu como primer esperiencia pa tener al asturianu como llingua vehicular y non sólo pa cursos puramente llingüísticos. Vamos siguir con estes esperiencies nel futuru”, apuntó Inaciu Galán, presidente del coleutivu, que tien anguaño abierta la matrícula pal d’asturianu en dos niveles y, como novedaes, el de creación poética, el de teatru y el de cómic.

Los alumnos y alumnes participantes nesti cursu van recibir el diploma acreitativu mientres un actu que va comenzar a les 19 hores nel Conseyu de la Mocedá de Xixón.