El Pueblu d'Asturies marcha de romería

"L'espaciu del Muséu del Pueblu d'Asturies, en Xixón, celebra la festividá de San Pedro, patrón de la ciudá, con una romería na que nun faltará nengún de los ingredientes d'una de les tradiciones con más puxu n'Asturies.

Dende les 11.00 de la mañana podrá disfrutase de los puestos d'artesanía, alimentación y el chigre; amás de l'ambientación musical de la bandina de ""Los Llanzones"", qu'acompañarán les actividaes folixeres que van a desarrollase a lo llargo de tola xornada.

A les 11.30 hores tendrá llugar la misa n'asturianu, oficiada por Manuel García de Jesús, presidente del Coleutivu Manuel Fernández de Castro; tres la que vendrá, como ye vezu, la procesión y puya'l ramu, acompañada polos bailles del grupu ""Escontra'l raigañu"".

A lo llargo la tarde, y dempués de la xinta en prau, entamará la sesión de cuentos pa neños y mayores, a cargu de ""Tragaluz Teatru"" y Milio'l del Nido y Manolo la Cabén respeutivamente. Amás, les asociaciones ""Escontra'l raigañu"" y ""Na señardá"", entamarán un taller de baille asturianu pa tol que quiera animase.

A les 20.30 hores, y poniéndo-y el ramu a la xornada festiva, los miembros de La Bandina pondrán-y música a la foguera y la danza prima, al tiempu que presenten los temes del so últimu trabayu discográficu ""13"".

La organización de l'actividá correspuénde-y al Muséu del Pueblu d'Asturies en comuña cola Conceyalía de Cooperación, Cultura Tradicional y Política Llingüística del Ayuntamientu de Xixón. Asina mesmo collaboren el Departamentu de Festexos y el Teatru xovellanos.

Na semeya: integrantes de "Los Llanzones""