“Tocar l’himnu en Times Square emocionó a muncha xente, comenzado por nosotros”, asegura Vítor Carbajal

806.000 reproducciones lleva’l videu que la Banda Gaites Llacín xubió a redes sociales de la so interpretación en Times Square, corazón de Manhattan, del himnu d’Asturies el día de St. Patrick. “Tocalu emocionó a muncha xente, comenzando por nosotros”, afirma’l so direutor Vítor Carbajar tres tornar de New York.

La formación con sede en Porrúa viaxó a Estaos Xuníos el pasáu día 13 convidaos pola Asociación de Amigos del Desfile de San Patricio en New York pa participar nel popular St. Patrick’s Day Parade de la ‘gran mazana’ como representante d’Asturies nesta edición celebrada’l vienres coincidiendo cola festividá del santu patrón d’Éire. “Foi too mui bien y mui positivo. Meyor de los qu’esperábamos”, asegura Carbajal de vuelta en casa.

Millones de persones pudieron ver en vivo y per televisión o la rede’l desfile de les munches formaciones estauxunidenses y procedentes de toles naciones celtes, dende Breizh a Asturies, pasando per Galicia, que paraliza tolos 17 de marzu la Quinta Avenida ente les cais 44 y 79. Una actuación que pa Llacín siguió cola interpretación de delles pieces en Times Square, ún de los puntos más transitaos de Manhattan, ente ellos una mui especial que tuvo un repercusión impresionante n’Asturies y, inclusive, a nivel estatal: l’himnu d’Asturies.

“Tocalu emocionó a muncha xente, comenzando por nosotros”, esplica Carvajal, sorprendíu entovía pol algame viral del vidu. “Cuando fuimos a China y tocamos na Gran Muria llegamos a les 150.000 reproducciones, pero’l de Times Square lleva 806.000”, señala.

Actuación con Carlos Núñez

Los nueves díes que tuvieron los 60 integrantes de Llacín –la banda tien en total 75– per tierres norteamericanes foron mui productivos pa la banda, yá qu’amás de les cuatro cites que teníen programaes sumaron sobre la marcha delles más en dellos puntos cercanos a New York. El debú foi’l día 14 nun conciertu entamáu pol Festival Interceltique de Lorient en The Highline Ballroom nel que tamién participó’l grupu llocal de folk irlandés Solas y la Bagad Sonerien An Oriant, y que siguió con una fest-noz.

El sábadu, mentes, collaboraron nel Kauffman Musical Center nun conciertu col gallegu Carlos Núñez, de xira per Estaos Xuníos, y tocaron nel Centro Español de Queens. Llueu llegaron invitaciones pa llevar la música del país al Centro Español de Newar y al Centro Orensano d’esta mesma población de New Jersey o al Círculo de la Hispanidad de Long Island, y pa participar nel St. Patrick's Day Parade qu’en Bayonne se celebra’l domingu, ente otres.

“La cultura asturiana nun ye desconocida ellí porque yá foron otres formaciones enantes, pero siempre presta contribuyir a dala a conocer y quitar estereotipos”, apunta’l direutor de la formación llanisca, que cuenta con una espectacular Escuela de Música Tradicional con 200 alumnos que deprenden a tocar la gaita, la percusión, el tambor, la caxa, el violín, la flauta travesera y l’acordión diátonicu, amás de contar con una bandina infantil con 60 miembros y una bandina tradicional d’adultos formada por 15 persones.