El Gobiernu reformará la Llei de Llibertá Relixosa

"La vicepresidenta primera del Gobiernu, María Teresa Fernández de la Vega, aseguró esti martes que'l Gobiernu va revisar la Llei de Llibertá Relixosa del añu 1980 pa incorporar la xurisprudencia del Tribunal Constitucional sobre llibertá de conciencia.

A lo llargo de la so intervención na Comisión Constitucional nel Senáu, De la Vega indicó que, ""pol momentu nel que foi ellaborada"" esta llei, ""desconoz el derechu a la llibertá de conciencia, silenciando la regulación de la mesma"". Asina, la vicepresidenta añade que la norma tampoco tien en cuenta ""munchos avances introducíos pola xurisprudencia del Tribunal Constitucional rellacionaos col conteníu y les condiciones d'exerciciu d'esti derechu nun Estáu aconfesional"".

De la Vega indicó qu'esta xurisprudencia ""yá alvirtió sobre les llendes del derechu a la llibertá relixosa en determinaos contestos públicos nos que se desarrolla la vida en común"", como son ""los centros escolares, los hospitales públicos o los ámbitos d'actuación de les Fuerces Armaes"". Nesti sen, el Gobiernu considera que ""ye tiempu de reflexonar coles demás fuerces polítiques"", sobre los conflictos ente llibertá relixosa y otros derechos fundamentales (a la vida, a la educación, al trabayu) pa proceder, ""col debíu consensu, a les igües necesaries de la llei, adautándola a la realidá de la España d'anguaño"".

Al empar, l'Executivu socialista considera que la llei tien de ser iguada porque ""el calter laicu del Estáu desixe-y una mayor neutralidá énte'l fenómenu relixosu"", de mou que se reblague penriba de ""situaciones de discriminación d'unes confesiones o creencies respeuto a otres"". En cualesquier casu, esplicó que la reforma va facese dende ""el consensu absolutu"". ""Nun se trata de llexislar escontra naide"", pero ye un cambiu necesariu porque ""la perceición ciudadana del fenómenu relixosu, sobre tou no que cinca a lo público, esperimentó cambios significativos dende 1980"", añadió.

Pa finar, De la Vega recordó que la Constitución española regula'l laicismu del Estáu, ""que nun ye la inxerencia de nenguna relixón nos asuntos públicos"" y añadió que'l Gobiernu caltuvo unes rellaciones de ""respetu"" coles distintes relixones durante la pasada llexislatura.

Pela so parte'l voceru popular nesta comisión, José Fernández, avisó al Gobiernu de que'l PP va apoyalu si esta modificación ye ""p'avanzar na llibertá relixosa"", pero si val pa que ""l'Estáu tome partíu escontra la relixón y qu'ésta desapaeza de la vida pública, entós el PP va tar a la escontra por ser un aspeutu contrariu a la Constitución"".

D'otru llau, el voceru de CiU, Jordi Casas, dixo que ye ""un tema complicáu"" qu'hai que ""alministralu con munchu procuru, calma y tranquilidá""."